Gələn ildən Azərbaycan və İran arasında ticarət dövriyyəsinin artırılması istiqamətində addımlar atılacaq.

Bunu açıqlamasında İranın Azərbaycandakı səfiri Seyid Abbas Musəvi deyib.

S.A.Musəvinin sözlərinə görə, son statistika iki ölkə arasında ticarətin artdığını əks etdirir. Belə ki, koronavirus pandemiyası və bir sıra məsələlərə baxmayaraq, iki ölkə arasında ticarət dövriyyəsi 10 ay ərzində ötən ilin analoji dövrü ilə müqayisədə 30% artıb.

İran səfiri əlavə edib ki, bunun özü gələn il ticarətin artırılmasının müjdəçisi ola bilər. Bundan başqa, iki ölkənin ticarətini artırmaq istiqamətində tranzit üzrə potensiallar var.

“Türkmənistanın paytaxtı Aşqabadda İƏT-in XV Zirvə Toplantısı çərçivəsində Azərbaycan və İran Prezidentlərinin görüşündən sonra iki ölkənin iqtisadi münasibətlərində ciddi inkişafın şahidi olacağıq. Bu da mütləq iki dövlətin və iki ölkə xalqlarının xeyrinə olacaq” –deyə o bildirib.

Qeyd edək ki, Azərbaycan Dövlət Gömrük Komitəsinin statistikasına əsasən, Azərbaycan və İran arasında ticarət dövriyyəsi 10 ay ərzində 337 milyon dollar dəyərində təşkil edib. Qeyd olunan müddətdə Azərbaycan İrana 26,1 milyon dollar dəyərində məhsul ixrac, İrandan 311 milyon dollar dəyərində məhsul idxal edib.