Niyaməddin Orduxanlı: "Azərbaycanla bağlı apardığı işlər fiaskoya uğradı"

Elşən Musayev: "Üzərimizə çamur atmağa, bu mötəbər turniri gözdən salmağa çalışırlar"

"I Avropa Oyunları Azərbaycan dövləti üçün çox böyük tarixi hadisədir. Artıq milyonlarla insan gördü, izlədi və tamaşaçısı oldu ki, müstəqil Azərbaycan dövləti hüquqi, dünyəvi və Avropa dəyərlərini özündə yaşadan tolerant bir ölkədir". Bunu Bütöv Azərbaycan Xalq Cəbhəsi Partiyasının (BAXCP) ictimai-siyasi məsələlər üzrə katibi Niyaməddin Orduxanlı deyib.
Onun sözlərinə görə, açıq şəkildə dünya Azərbaycan həqiqətlərini öz gözləri ilə gördü və görməkdə də davam edir: "Uzun illərdir anti-Azərbaycan kampaniyası aparan erməni və ermənipərəst qüvvələrin Azərbaycanla bağlı apardığı işlər fiaskoya uğradı. Bütün dünya gördü ki, Azərbaycanda dövlət ənənəsi mövcuddur və başqa dinlərin nümayəndələri ilə yanaşı, təriqət daşıyıcıları da bu ölkədə yaşayır və onların heç bir problemi mövcud deyil. Azərbaycanı dünyada pis qələmə vermək üçün uzun illərini və xeyli maliyyə vəsaiti xərcləyən bu qüvvələr Azərbaycanın bu uğuru ilə barışa bilmirlər. Odur ki, hər gün Avropanın və ya başqa qitələrin 2000-ə yaxın televiziyası, informasiya agentliyi, xəbər portalları, saytlar və sosial şəbəklər Azərbaycanda keçirilən ilk Avropa Oyunları ilə bağlı reportaj yayımlayır. Bu da Azəraycanın dövlət kimi tanınmasında böyük rol oynayır".
Azərbaycan Demokratik Maarifçilik Partiyasının sədri Elşən Musayev isə deyib ki, I Avropa Oyunları bütün dünyanın diqqətini Azərbaycana yönəldib. Partiya sədrinin sözlərinə görə, bunu başa düşmək, anlamaq üçün xüsusi istedada ehtiyac yoxdur: "Çünki bütün proseslər gözlərimizin önündə cərəyan edir, bütün dünya son bir neçə gündə Azərbaycandan danışır, bütün baş verənlər bizim uğurumuz, tərəqqimiz kimi qiymətləndirilir. Əlbəttə ki, bu müvəffəqiyyəti həzm etməyən qüvvələr də var. Ona görə də özlərinə əl qatıblar və bir şəkildə üzərimizə çamur atmağa, bu mötəbər turniri gözdən salmağa çalışırlar. Amma alınmayacaq. Azərbaycan dövləti həqiqətən də bu cür ünsürlərə qarşı immunitetlidir. Arzu edirəm ki, doğma vətənimizi təmsil edən idmançılar uğurlarını sona qədər davam etdirsinlər. Bizə və onlara yaraşan da budur".

Əli