Şəhram Rəsuli Ərdəbilin Nüfus Mərkəzinin (Vətəndaşların Qeydiyyat İdarəsi) komissiyalarının toplantısında bildirib ki, yeni günəş ilinin ilk üç ayında ölüm hallarının çoxalmasında koronavirus və başqa amillərin təsiri olub.

O, hazırda əhalinin artımı ilə bağlı prosesinin mənfiyə doğru getdiyini və son 3 ay ərzində əyalətdə yeni doğulan körpələrin ötən ilin eyni dövrü ilə müqayisədə 9.9% azaldığını vurğulayıb.

Ş.Rəsuli bildirib ki, əyalətdə əhalinin azalmasının əsas səbəblərindən biri ailələrin müxtəlif problemlər, o cümlədən iqtisadi çətinliklər ucbatından uşaq dünyaya gətirməkdən imtina etməsi və ya bir uşaqla kifayətlənməsidir.

O, qeyd edib ki, sığortanın əlçatan olmaması və tibbi xidmətlərin bahalığı təbii artımın azalmasına təsir edən amillərdəndir.

Qeyd edək ki, son illərdə Ərdəbil əyalətində əhalinin sürətlə qocalması, əhalinin sayının azalması, ölüm hallarının çoxalması ilə bağlı müxtəlif məlumatlar yayılıb.

Mütəxəssislər hesab edir ki, əhalinin azalmasına işsizlik və yoxsulluq ucbatından insanların bölgəni tərk edərək daha böyük şəhərlərə, özəlliklə Tehrana köçməsi də təsir edir.

Gunaz.tv