Hadisədə Rusiya izi axtarılır

Cavid

Ankarada törədilən terror aktları bu gün də aktual mövzuya çevrilib. Bir gündə dalbadal iki terror aktının törədilməsinin əsas müəlliflərindən birinin PKK olduğu faktı danılmazdır. Bu işdə rəsmi Moskvanın da əlinin olduğu iddia edilir.
Gürcü politoloq Gela Vasadze söyləyib ki, Ankara teraktını məhz Rusiya xüsusi xidmət orqanlarının törətməsini demək üçün kifayət qədər əsasımız yoxdur.
Onun sözlərinə görə, artıq Rusiya ilə Türkiyə arasında savaş gedir:"Kremlin bu teraktın törədilməsində barmağının olması ehtimalı var. Əgər terroru PKK terrorçuları həyata keçiribsə, bunun əsas məqsədi Türkiyədəki situasiyanı destablizasiya etmək, Ərdoğana zərbə endirmək və ictimaiyyət arasında narazılığı artırmaqdır. Moskvanın PKK-nı aktiv dəstəkləməsi isə polişinel sirdir (hər kəsə bəlli olan – red.). Əgər teraktların arxasında İŞİD-in olduğu bilinsə, o zaman burada da Rusiya xüsusi xidmət orqanlarının rolunu tam istisna etmək olmaz. Məhz İŞİD-in sıralarında bu cür teraktları həyata keçirməyə qadir olan ruslar yox deyil.

Ancaq bu teraktın vasitəsilə Ankaraya xəbərdarlıq etmək gecdir. Artıq Rusiya ilə Türkiyə arasında müharibə gedir, bu terakt isə həmin döyüş fəaliyyətinin bir hissəsidir. Moskvada yaxşı bilirlər ki, Ərdoğan öz mövqeyindən geri çəkilməyəcək. Ərdoğanın həmçinin Azərbaycana olan səfərini təxirə salmasından istifadə edən Moskva əlinə düşən zamandan yararlanaraq, Bakıya qarşı təzyiqləri artıra bilər. Biz böyük dəyişikliklər ərəfəsindəyik. Tərəflər şahmat taxtası üzərində təkcə öz fiqurlarını yerləşdirməyib, onlar həm də aktiv gedişlər etməyə başlayıblar".
REAL İdarə Heyətinin üzvü Erkin Qədirli də bu teraktın arxasında Rusiya xüsusi xidmət orqanlarının dayanması ehtimalının mümkünlüyü barədə sosial şəbəkədə status paylaşıb. Onun sözlərinə görə, bu terror Türkiyənin Suriyaya ordu yeritməsini istəməyən ölkələrin marağındadır:
"Admiral Soner Polad Türkiyə qoşunlarının Suriyaya yeridilməsinin önəmi haqqında danışdı. Üstündən bir neçə gün keçəndən sonra Türkiyə Hərbi Dəniz Qüvvələrinin komandanlığı qarşısında güclü partlayış törədildi, xeyli insan öldü və yaralandı. Sübutum yoxdur, amma burada təsadüfə inanmıram. Türkiyənin Suriyaya qoşun yeritməsini istəməyən hər kimdirsə, bu terror onun marağındadır və güman ki, onun təşkilatçılığı, ya da yardımıyla törədilib. Mən Rusiyadan şübhələnirəm, amma Yaxın Şərqdə vəziyyət elə qarışıb ki, bu terror bir neçə dövlətin də marağında ola bilər".
Qeyd edək ki, 17 fevralda Ankarada baş verən terakt nəticəsində 28 nəfər həyatını itirib, 61 nəfər yaralanıb.
Şərq-Qərb Araşdırmalar Mərkəzinin rəhbəri Ərəstun Oruclunun fikrincə isə, bu hadisə Türkiyə hökumətinə verilən mühüm mesajdır.
Politoloq Ankarada 28 nəfərin ölümü ilə nəticələnən teraktla bağlı iki mümkün ehtimalı açıqlayıb:"Ankara terrorunun Türkiyəni Suriya müharibəsinə yaxınlaşdırması barədə fikir yürütmək çətindir. Çünki terrorun məqsədi bəlli deyil. Ancaq terrorun Türkiyə baz naziri və prezidentinin eyni gündə müxtəlif istiqamətlərdəki səfərləri ərəfəsində Baş Qərargah yaxınlığında törədilməsi bir çox məqamlardan xəbər verir. Əslində, Türkiyə hökumətinə çox ciddi siyasi bir mesaj verilib. Mesaj ondan ibarətdir ki, əgər Türkiyə hökuməti xarici siyasət kursunu intensivləşdirməkdə və davam etdirməkdə israrlıdırsa, onda ağır problemlərlə üzləşəcək. Digər tərəfdən isə ola bilsin, bu terroru həyata keçirməkdə məqsəd, sadəcə, bu səfərləri pozmaq idi. Yəni ki, hər iki ehtimal mümkündür".
Qeyd edək ki,17 fevralda Ankarada baş verən teraktda 28 nəfər ölüb, 61 nəfər isə yaralanıb.