ABŞ bəyan edir ki, Guantanamo Bay həbsxanasındakı 15 məhbus Birləşmiş Ərəb Əmirliklərinə göndərilib ki, bu da Barack Obamanın prezidentliyi dövründə ən böyük transferdir.
Pentaqon deyir ki, 12 yəmənli və 3 əfqanın transfer olunması həbsxanadakı məhbusların ümumi sayını 61-ə endirib.
Məhbusların çoxu hər hansı məhkəmə olmadan 10 ildən çox həbs cəzası alıb.
Prezident Obama istəyir ki, vəzifəsindən getməzdən əvvəl həbsxananı bağlasın.
Ağ Ev həbsxanada qalan digər məhbusları ABŞ-a transfer etmək istəyir, lakin Konqres bununla razılaşmır.
Bazar ertəsi yayılan məlumatda Pentaqon deyir: "ABŞ hakimiyyəti humanist jestinə və Guantanamo Bay həbsxanasını bağlamaq istəyini dəstəklədiyinə görə Birləşmiş Ərəb Əmirlikləri hökumətinə təşəkkür edir."
Aprel ayında 9 yəmənli məhbus Səudiyyə Ərərbistanına göndərilib.
Guantanamo Bay həbsxanası Kubanın cənub-şərqindəki ABŞ dəniz bazasında yerləşir.
2001-ci ildə ABŞ-da baş verən hücumdan sonra sabiq prezident George W Bush terrorda şübhəli bilinən əcnəbiləri yerləşdirmək üçün bu həbsxananı açmışdı.
İllik xərci 445 milyon dollara başa gələn həbsxanada 700-dən çox məhbus saxlanılıb.
Fevral ayında Ağ Ev həbsxananı bağlamaq üçün Konqresə plan təqdim edib.