NeoSSRİ-yə doğru daha bir addım Dünya

NeoSSRİ-yə doğru daha bir addım

Keçmiş imperiya hüdudlarında yaşayan rusdilli əhali Rusiya vətəndaşlığına qəbul olunacaq

Prezident Vladimir Putin keçmiş SSRİ ərazisində yaşayan rusdilli əhaliyə Rusiya vətəndaşlığının verilməsini asanlaşdıran qanunu imzalayıb. Bu barədə Kremlin mətbuat xidməti məlumat yayıb.
"Rusiya Federasiyasının vətəndaşlığı haqqında" qanuna dəyişikliklər edilməsi haqqında" qanuna əsasən, Rusiya Federasiyası ərazisində yaşayan və "rus dilinin daşıyıcısı" kimi tanınan xarici vətəndaşlar və vətəndaşlığı olmayan şəxslərin Rusiya vətəndaşlığına qəbulu sadələşdirlimiş qaydada aparılacaq. Hazırda və ya əvvələr mütəmadi olaraq Rusiya Federasiyası ərazisində, yaxud Rusiya imperiyası və SSRİ-nin dövlət sərhədləri daxilində yaşayan, bu dildə danışan, rus dilindən ailə-məişət, ictimai, mədəni və digər sferalarda istifadə edən şəxslər və onların qohumları "rus dilinin daşıyıcıları" kateqoriyasına daxil edilib. Əcnəbinin rus dilini bildiyi və xarici ölkə vətəndaşlığından imtina edəcəyi halda bu qanun ona şamil ediləcək. Əgər "rus dilinin daşıyıcısı" olan həmin şəxsin vətəndaşlığı Rusiya ilə imzalanmış beynəlxalq müqavilə çərçivəsindədirsə, yaxud xarici ölkə vətəndaşlığından imtina həmin xarici vətəndaşın iradəsindən asılı deyilsə, o zaman əcnəbi ölkə vətəndaşlığından imtina tələb olunmur. Əcnəbi vətəndaşlıqdan imtina edən xaricilər sadələşdirlmiş qaydada vətəndaşlıq ala bilərlər. Bunun üçün 5 il fasiləsiz Rusiya ərazisində yaşamaq tələb olunur. Belə vətəndaşlar üçün viza verilməsinin yeni qaydası tətbiq olunacaq. Həmin şəxs əgər "rus dilinin daşıyıcısı" kateqoriyasına salınıbsa, onun ölkədə qalıb işləməsi üçün veriləcək vizası yalnız Rusiya vətəndaşlığı üçün müraciət etdiyi təqdirdə uzadılacaq.
Bu kateqoriyadan olanlar üçün viza müddəti 3 illik nəzərdə tutulub. Əgər bu şəxs 2 il müddətində Rusiya vətəndaşlığı üçün rəsmi müraciət etməsə, onun vizası ləğv olunur. Göstərilən tələblərə uyğun gələn şəxslər üçün Rusiya vətəndaşlığı almaq üçün onların Rusiyaya gəlməsinə güzəştli şərtlər müəyyənləşdiriləcək.
Qeyd edək ki, Dövlət Duması qanunu aprelin 4-də qəbul edib.