Malorusiya layihəsi: Moskva Ukraynanı yox edir? Dünya

Malorusiya layihəsi: Moskva Ukraynanı yox edir?

Ukrayna separatçı qüvvələrə qarşı qabaqlayıcı tədbirlər görməsə, Malorusiyanın ərazisi təkcə Donetsklə məhdudlaşmayacaq.
Bu sözləri politoloq İlqar Vəlizadə Ukraynada Malorusiya adlı yeni qondarma dövlətin yaradılması məsələsini şərh edərkən deyib.
"Ukraynada yeni dövlət yaradılması təşəbbüsü ilə çıxış edən insanlar nəzərdə tuturlar ki, bu dövlətə Ukraynanın rusdilli digər regionları da qoşula bilər. Onlar bununla sözügedən qondarma qurumun həcmini böyütməyi planlaşdırırlar. Bu, əslində, onların planlarından xəbər verir. Onlar qondarma Donetsk Xalq Respublikasının əraziləri ilə kifayətlənməyiblər və digər regionlara göz dikiblər. Əlbəttə ki, bu, çox təhlükəli bir addımdır", - o bildirib.
Ekspertin fikrincə, Rusiya Ukraynadakı bütün separatçı qüvvələri vahid bir nöqtədə birləşdirsə, Malorusiya layihəsininin effektini görəcək:
"Maraqlısı budur ki, Donetskin irəli sürdüyü bu fikri digər separatçı rejim olan qondarma Luqansk Xalq Respublikası dəstəkləməyib. Donetsklə Luqansk arasında müəyyən ziddiyyətlər var və həmin problemlər ara-sıra üzə çıxır. Belə vəziyyətdə bütün bu separatçı regionları birləşdirmək çətin olur. Təbii ki, proseslərin necə nəticələnməsi konkret siyasi gedişlərdən asılıdır. Əgər Rusiyaya qarşı Qərb tərəfindən hansısa addımlar atılsa, Ukrayna Rusiyaya qarşı daha sərt mövqe qoysa, bu prosesin qarşısını almaq mümkündür. Əks təqdirdə Rusiyanın dəstəklədiyi qondarma qurumların hesabına bu layihənin miqyası böyüyəcək. Malorusiya dövlətinin yaradılması tamamilə olmasa da, yavaş-yavaş Ukraynanın müəyyən hissəsinə, xüsusilə də rusdilli əhaliyə şamil oluna bilər. Əgər Qərbdən real təzyiqlər olsa və Ukrayna Malorusiyanın yaradılması ilə bağlı qabaqlayıcı tədbirlər görsə, bu, sadəcə layihə olaraq qalacaq".
Qeyd edək ki, qondarma Donetsk Xalq Respublikasının rəhbəri Aleksandr Zaxarçenko Malorusiya dövlətinin yaradıldığını elan edib.
"Exo Moskva" radiosunun rəhbəri Aleksey Venediktov isə söyləyib ki, Malorusiyanın yaradılmasına Kreml xeyir-dua verib.
"Malorusiya"nın yaradılması ilə bağlı tarix elə də pis deyil. Təkcə informasiya məkanından yox, həm də hakimiyyət meydanlarından itən Vladislav Surkov (Rusiya prezidentinin köməkçisi, Novorossiya layihəsinin icraçısı – red.), görünür, məzəli konsepsiya təklif edib. O, gələcəkdə Ukraynanı Rusiyanın tərkib hissəsi edəcək vassal layihəsini işə salıb.
Malorusiya Rusiya imperiyasının tərkib hissəsidir. Burada Krım və ya Abxaziya ssenarisi üzrə yox, Cənubi Osetiya ssenarisi üzrə hərəkət ediləcək və sonunda birləşmə olacaq. İndi isə hələlik Almaniya Demokratik Respublikası və Almaniya Federativ Respublikası tipi yaradılır", – deyə o bildirib.