"10 ildən çoxdur ki, onlayn sınaq imtahanları edirik. Bu ilin mart ayından pulsuz onlayn sınaq imtahanı keçirilir".
Bunu Nazirlər Kabineti yanında Operativ Qərargahın mətbuat konfransında Dövlət İmtahan Mərkəzinin Direktorlar Şurasının sədri Məleykə Abbaszadə bildirib.
O deyib ki, hüquqi nəticəsi olan imtahanlarla bağlı təchizat fərqlidir: "Bu imtahanı yoxlayıcı şəxs izləyir, görüntü yazılmalıdır. Bunu nəzərə alaraq, yeni sınaq imtahanı mayın 20-dən sonra təqdim ediləcək. Orada hansı format olacaq, görüntü necə yazılacaq və s. bilinəcək".
M. Abbaszadə deyib ki, 120 min IX, 80 min XI sinif məzunu var, onlardan cəmi 31 mini sınaq imtahanlarında iştirak edib: "Bu da göstərir ki, onlar tam olaraq onlayn imtahan keçirməyə hazır deyillər. Kontingenti az olan imtahanları birinci yoxlamaq istəyirik. Onları regionlarda müəyyən yerlərdə kompüter arxasında imtahana dəvət edəcəyik. Amma istəyən kağız daşıyıcılarla olan imtahanda iştirak edə bilər".