Bahar Muradova: "Azərbaycanla hesablaşmayanların aqibəti Lapşinin aqibəti kimi ola bilər"

Dağlıq Qarabağa qanunsuz səfərlər edib separatçı rejimin təbliğatı ilə məşğul olan, antiazərbaycan xarakterli bəyanatlarla çıxış edən Aleksandr Lapşinin ekstradisiyası ədalətin təntənəsidir.
Bunu Trend-ə Milli Məclisin sədr müavini Bahar Muradova deyib.
Aleksandr Lapşinin ekstradisiyasını Azərbaycan dövlətinin siyasətin nəticəsi sayan Bahar Muradova qeyd edib ki, Azərbaycanla, onun qanunları ilə hesablaşmayanların aqibəti Aleksandr Lapşinin aqibəti kimi ola bilər.
MM sədrinin müavini əlavə edib ki, Aleksandr Lapşinin ekstradisiyası Azərbaycanı, onun qanunlarını nəzərə almadan ictimaiyyəti işğal olunmuş ərazilərə qanunsuz səfərlər etməyin mümkünlüyünə inandıran dairələrin iflasa uğramasıdır.
Bahar Muradovanın sözlərinə görə, bu addımın atılması Dağlıq Qarabağ separatçı rejiminə, özünü "demokratik" ölkə kimi tanıtdırmaq istəyən Ermənistana və onu dəstəkləyən dairələrə, eyni zamanda Aleksandr Lapşin kimi hərəkətlər etmə barədə düşünənlərə bir mesajdır.
Ermənistanın Xarici İşlər Nazirliyinin Aleksandr Lapşinin ekstradisiyasının insan haqlarının, demokratiyasının pozulması kimi qiymətləndirməsinə münasibət bildirən Bahar Muradova əlavə edib ki, bu məsələlərlə bağlı danışmaq imkanı ən son halda Ermənistana verilə bilər.
MM sədrinin müavini hesab edir ki, Aleksandr Lapşinin ekstradisiyası beynəlxalq hüquqa - ölkələrarası ekstradiyaya dair müqavilələrə tam uyğundur:
"Hazırkı şəraitdə ölkələrin ərazi bütövlüyünü, sərhədlərin toxunulmazlığını, beynəlxalq hüququn prinsipləri altında qorunmalı olan məsələlərin diqqətdən kənar qalmasını eyninə almayan, bu hüquqları pozmağı özü üçün qəhrəmanlıq sayan Lapşin kimi adamların mövcudluğu Ermənistanın və onun rəsmilərini bu şəkildə danışmağa vadar edir. Hesab edirəm ki, bu ekstradisiya ilk növbədə həm Azərbaycan, həm Belarus hökumətinin beynəlxalq hüquqa və ölkələrarası münasibətlərə, müqavilələrə sadiqliyinin və hüquqa söykənən münasibətinin göstəricisidir. Bunu da hər kəs qəbul etməlidir. Ermənistan isə artıq bu istiqamətdə bu günə qədər gördükləri işin iflasa uğramalarının fərqindədir. Ona görə də düşünürəm ki, onların narahatlıqları "anlaşılan"dır."