"Gedişat göstərir ki, Ermənistanın baş naziri Nikol Paşinyan müxtəlif bəyanatlar verməklə, danışıqlardan, əsas mövzudan yayınmaq fikrindədir. O hər dəfə təkrar edir ki, Azərbaycanla aparılan danışıqlar Dağlıq Qarabağ münaqişəsi ilə bağlı deyil, hələlik söhbət formatdan, onun texnologiyasından gedir. Halbuki gündəlikdə açıq şəkildə müzakirə olunan məsələ var ki, bu da Azərbaycan torpaqlarının işğaldan azad olunmasıdır". Bu fikirləri politoloq Fikrət Sadıqov deyib.
Politoloq söyləyib ki, Paşinyanın təxribat xarakterli bəyanatları münaqişənin həlli istiqamətindən prioritetinin olmadığını göstərir: "Paşinyan anlayır ki, əgər o keçmiş rəhbərliyi uzaqlaşdırıb, hakimiyyətə gəlibsə, yeni fikir ortaya qoymalıdır. Amma bunun qarşılığında müxtəlif bəyanatlarla bundan yayınmağa çalışır. Reallıq odur ki, Paşinyandan öz ölkəsində danışıqların məzmunu tələb edilir. Belə ki Ermənistan parlamenti, müxalif partiyalar ondan məruzə tələb edirlər. Belə bir vəziyyətdə olan Paşinyan görünür hələ konkret danışıqlara hazır deyil".
F.Sadıqov bildirib ki, Paşinyan bir tərəfdən danışıqlara getsə də, digər tərəfdən də özünün sığortalayır: " Amma Paşinyan gec-tez danışıqlara gəlməlidir. Onun başqa çıxış yolu yoxdur. Azərbaycan separatçı qurumu masa arxasına yerləşdirmək niyyətində deyil. Onların bu mərhələdə heç bir rolu yoxdur. Paşinyan bunu başa düşərək, müxtəlif ziddiyyətli bəyanatlar verərək, danışıqlardan yayınmağa çalışır".
Bir çox məsələlərin danışıqların gündəliyindən asılı olacağını deyən politoloq qeyd edib ki, Azərbaycan tərəfi mövqeyini dəyişmərək danışıqlara hazırdır: "Azərbaycan beynəlxalq hüquq normalarına hörmət edən, sadiq ölkədir. Biz konkret məsələləri müzakirə etməli, görüş naminə görüşə getmirik. Əgər yaxın müddətdə hər hansı görüş keçirilsə təbii ki orada yalnız münaqişənin həlli müzakirə olunacaq. Çünki bizim başqa mövzumuz yoxdur".