Müxalifət lideri sol gözünün altından bir neçə yumruq zərbəsi alaraq yerə yıxılıb

Türkiyə Cümhuriyyət Xalq Partiyasının (CHP) lideri Kamal Kılıçdaroğlu Türkiyə Böyük Millət Məclisinin (TBMM) binasında hücuma məruz qalıb. APA-nın xəbərinə görə, K. Kılıçdaroğlu CHP parlament fraksiyasının toplantısının keçirildiyi salona gedərkən qəflətən yumruq zərbəsinə tuş gəlib.
Hadisə zamanı K. Kılıçdaroğlu sol gözünün altından bir neçə yumruq zərbəsi alaraq yerə yıxılıb və onun pencəyi cırılıb. Kılıçdaroğlunun hücum edən şəxsi yaxalayıb və CHP üzvləri onu döyməyə başlayıblar. Bəzi CHP millət vəkilləri ağlayıb. Türkiyə xəbər agentliklərinin məlumata görə, müxalifət liderinə hücum edən şəxsin Ankarada yaşayan 1986-cı il təvəllüdlü ərzurumlu, əvvəllər silahlı hücum və narkotik cinayətləri ilə məhkum edilmiş Orxan Övən olduğu müəyyən edilib.
O. Övən polisə ilkin ifadəsində "Alpərən Ocaqları"nın üzvü olduğunu bildirib. Qeyd edək ki, "Alpərən Ocaqları" mərhum Muhsin Yazıçıoğlunun yaratdığı millətçi-islamçı Böyük Birlik Partiyasına yaxın qurumdur.
İnsidentə baxmayaraq, K. Kılıçdaroğlu CHP millət vəkili İhsan Özkesin pencəyini geyərək fraksiya toplantısına qatılıb və çıxış edib. O, hər kəsi sakitliyə çağırıb: "Demokratiya yolu əngəllərlə doludur. Hücumlar, təzyiqlər bizim qarşımızı kəsə bilməz. Bu, CHP liderinə edilən ilk hücum deyil. Rəhmətlik İsmət İnönüyə də daşlar atıldı, başı yarıldı. Biz kimisə önündə diz çökən, geri çəkilən deyilik".
Türkiyənin baş naziri Rəcəb Tayyib Ərdoğan Cümhuriyyət Xalq Partiyasının (CHP) lideri Kamal Kılıçdaroğlunun hücuma məruz qalmasına münasibət bildirib. Ərdoğan demokratik parlamentar sistem içərisində bu cür hərəkətlərin yolverilməz olduğunu deyib: "Belə əməlləri qətiyyətlə pisləyirik. Mən hörmətli Kılıçdaroğluna keçmiş olsun deyirəm. Ona telefon açaraq bunu söyləyəcəyəm".
Prezident Abdulla Gül isə K. Kılıçdaroğluna zəng edərək "keçmiş olsun" diləklərini çatdırıb. Böyük Millət Məclisinin sədri Cəmil Çiçək və parlamentdə təmsil olunan siyasi partiyalar da hadisəni pisləyən açıqlama veriblər.