Nizami Gəncəvi Cənubi Qafqazın ən görkəmli epik əsər yaradıcılarından biridir.

“APA-Economics” xəbər verir ki, bunu WUF13-də “Aborigen xalqlar üçün adekvat mənzil” mövzusunda keçirilən dəyirmi masada Beynəlxalq Təbiəti Mühafizə İttifaqının (IUCN) Yerli Xalqlar və Yerli İcmalar üzrə İşçi Qrupunun həmsədri Florensia Soto Nino-Martinez bildirib.

O deyib ki, Nizami Gəncəvinin yaradıcılığı dünyanın müxtəlif bölgələrində tanınır və onun “Leyli və Məcnun” əsəri Hindistanın Manipur bölgəsində də məlumdur.

Onun sözlərinə görə, XII əsrdə yaşamış Nizami Gəncəvi insanların tarix boyu müxtəlif böhranlarla üzləşdiyini göstərib, eyni zamanda, bu problemlərin həlli yollarının da mövcud olduğunu vurğulayıb.

“2026-cı ildə yaşamağımıza baxmayaraq, Nizaminin XII əsrdə irəli sürdüyü fəlsəfə bu gün də aktuallığını qoruyur”, – Florensia Soto Nino-Martinez qeyd edib.

O əlavə edib ki, Nizaminin birgəyaşayış, sülh, təhlükəsizlik və mənəvi dəyərlərlə bağlı ideyaları müasir dünyanın çağırışları fonunda da əhəmiyyətini saxlayır.