Media nümayəndələri Füzuli rayonunun işğaldan azad olunmuş Qacar kəndi ərazisinin minalardan və partlamamış hərbi sursatlardan təmizlənməsi prosesini izləyiblər.

APA-nın media-turda iştirak edən əməkdaşının verdiyi məlumata görə, jurnalistlər əl ilə, təlim itləri ilə, eyni zamanda Azərbaycan Ordusuna yeni daxil olmuş texniki avadanlıqlar vasitəsilə minatəmizləmə prosesi ilə tanış olublar.

Media nümayəndələrinə Azərbaycan Ordusunun mühəndis-istehkam bölmələri və Türkiyədən gələn mühəndis-istehkamçılar tərəfindən birgə aparılan təmizlənmə işləri haqda məlumat verilib.

Qeyd edək ki, media nümayəndələri bu gün təşkil olunan media-tur çərçivəsində əvvəlcə işğaldan azad olunmuş Cəbrayıl rayonunun Quycaq və Şəybəy kəndlərində aparılan minalardan və partlamamış hərbi sursatlardan təmizlənmə prosesini izləyiblər.