Yaponiya səfirliyinin dəstəyi ilə Şamaxıda, Mədrəsə qəsəbəsində tibb məntəqəsi tikilib. Xalqcəbhəsi.az xəbər verir ki, yeni tibb məntəqəsindən Mədrəsə qəsəbəsinin 2280 nəfər əhalisi və ümumlikdə, 5 ətraf kəndin 4267 nəfər sakini bəhrələnəcək.
Şamaxı rayonunun Mədrəsə qəsəbəsində tikilən tibb məntəqəsinin açılışında Şamaxı rayon icra hakimiyyətinin başçısı Tahir Məmmədov, Yaponiyanın ölkəmizdəki səfiri Vada Cüniçi, layihəni icra edən “Konstitusiya” Araşdırmalar Fondunun rəhbəri Əliməmməd Nuriyev iştirak edib. Yerli səhiyyə orqanlarının rəhbərliyi də mərasimə qatılıb.
Yaponiyanın ölkəmizdəki səfiri Vada Cüniçi qeyd edib ki, Mədrəsə qəsəbəsində yeni tibb məntəqəsi Yaponiya hökumətinin həyata keçirdiyi “Ot Kökləri və İnsan Təhlükəsizliyi” üzrə Qrant Yardımı Proqramı çərçivəsində inşa edilib: “Yeni tibb məntəqəsinin inşası nəticəsində təkcə sözügedən qəsəbənin əhalisi yox, həm də 5 ətraf kəndinin əhalisinə göstərilən tibbi xidmət şəraitinin yaxşılaşdığını eşitdiyim üçün çox şad oldum. Yaponiya hökumətinin bundan sonra da Azərbaycanın müxtəlif bölgələrinin əhalisinin ehtiyaclarına cavab verərək, Azərbaycan əhalisinin həyat şəraitinin yaxşılaşdırılması istiqamətində öz töhfəsini verməyə davam edəcəyini düşünürəm”.
Qeyd edək ki, Mədrəsə qəsəbəsində tibb məntəqəsi mövcud deyildi və əhali 1980-ci ildə inşa edilmiş İcra Hakimiyyəti Nümayəndəliyinin binasında ayrılmış bir otaqdan tibb məntəqəsi kimi istifadə edirdi. Lakin həmin tibb məntəqəsinə su xətti çəkilməmişdi və sanitar qovşaqla da təmin olunmamışdı. Üstəlik, tibb məntəqəsi yerləşən tikili köhnə olduğu üçün tibbi xidmətin göstərilməsi üçün istifadəyə yararsız vəziyyətdə idi.
Bu problemin həllinə böyük ehtiyacı, yeni tibb məntəqəsinin inşası üçün yerli resurs və imkanların olmadığını nəzərə alaraq “Konstitusiya” Araşdırmalar Fondu qrant yardımı üçün Yaponiya hökumətinə müraciət edib və müsbət cavab alıb.
7 otaqdan ibarət sözügedın tibb məntəqəsi (- 1 stomotoloji otaq, 1 peyvənd otağı, 1 pediatriya otağı,1 ginekoloji otaq, 1 müalicə otağı, 1 anbar, 1 sanitar qovşaq) inşası yerli sakinlərə göstərilən tibbi xidmət şəraitinin və keyfiyyətinin yaxşılaçmasına əhəmiyyətli töhfə verəcəkdir.
Layihədən Mədrəsə qəsəbəsinin 2,280 nəfər əhalisi və 5 ətraf kəndin toplam 4,267 nəfər əhalisi ( Mirikənd kəndinin 1,400 nəfər, Məlcək kəndinin 370 nəfər, Qaravəlli kəndinin 1,500 nəfər, Kərkəng kəndinin 680 nəfər, Kələxana kəndinin 317 nəfər sakini) bəhrələnəcək.