Azərbaycan və Rusiyanın opera müğənnisi, "Bolşoy Teatr"ının solisti, Azərbaycanın Xalq artisti və soprano Dinara Əliyeva Moskvada yubiley konserti keçirilib.

APA-nın Rusiya bürosu xəbər verir ki, "Bolşoy Teatr"ın Yeni Səhnəsində baş tutan konsertin adı "Vivere l'arte" (Sənəti yaşamaq) olub.

Dinara Əliyeva konsertin təşkilinə görə "Bolşoy Teatr"a minnətdarlığını bildirib: "2025-ci il mənim yubiley ilimdir. Bu gün yaradıcılıq gecəsi mənim 45-ci doğum günümə təsadüf edir. Üstəlik, "Bolşoy Teatr"ının 250-ci mövsümüdür. Sevimli "Bolşoy Teatr" səhnəsində iki hissədən ibarət böyük konsertlə çıxış etdiyim üçün inanılmaz dərəcədə xoşbəxtəm".

Müğənni həmçinin konsertin təşkilində ona kömək edən Millətlərarası Münasibətlərin İnkişafı üzrə "Poliloq" Fonduna təşəkkür edib: "Arzum belə bir böyük konserti Bakıya gətirməkdir. Ümid edirəm ki, Rusiya Mədəniyyət Nazirliyi və Azərbaycan Mədəniyyət Nazirliyi və Heydər Əliyev Fondu mənə vətənimdə belə bir tədbirə ev sahibliyi etməyimə kömək edəcəklər".

Xalq artisti həmçinin bu cür tədbirlərin Rusiya ilə Azərbaycan arasında mədəni əlaqələrin möhkəmlənməsinə töhfə verdiyini də söyləyib.

"Mən Azərbaycanlıyam, Bakıda anadan olmuşam. Amma mənim ikinci vətənim var - Moskvadır. Uzun illərdir ki, Rusiyanı bütün ölkələrdə təmsil edirəm. Biz, Azərbaycan müğənniləri, iki belə böyük ölkənin mədəniyyətlərini birləşdirən sənətimizin səfirləriyik", D. Əliyeva vurğulayıb.

Konsertdə Milli Məclisin Mədəniyyət komitəsinin sədri, bəstəkar və müğənni Polad Bülbüloğlu da iştirak edib.

"Mən çox məmnunam ki, bu gün" Bolşoy Teatr" da keçirilən bu gözəl vokal gecəsində Azərbaycan vokal məktəbi təmsil olunur. Dinara Əliyeva Azərbaycanın Xalq Artisti, Bülbül adına Beynəlxalq Vokal Müsabiqəsinin laureatı və Azərbaycan vokal məktəbinin məzunudur. Biz çox məmnunuq ki, Azərbaycan Rusiyanın əsas opera məkanında, dünyanın ən yaxşı teatrlarından birində təmsil olunur... Dinara Əliyeva əla vokal formasındadır.
O, tamaşaçıları valeh etdi. Reaksiyanı gördünüz. Bu səhnədə dünyanın hər yerindən vokalçılar parlayıblar", P.Bülbüloğlu bildirib.

Konsertdə "Bolşoy Teatr" ın orkestri və xorunun müşayiəti ilə Dinara Əliyeva Verdinin "La forza del destino" operasından Leonoranın "Pace, pace mio Dio!" ariyasını, Françesko Kileanın "Adriana Lecouvreur" operasından Adriananın ariyasını və Puççininin "Madama Butterfly" və "Edgar" operalarından Butterfly və Fidelia ariyalarını ifa edib, ikinci hissədə isə Frans Leqarın operettasından Cudittanın ariyası, "Oz ölkəsinin sehrbazı" filmindən mahnılar, "Vestsayd hekayəsi" müzikli və Ennio Morrikonenin "Cinema Paradiso" əsəri səsləndirilib.

D. Əliyeva konsertin sonunda maestro Niyazinin "Arzu" romansını ifa edib.

Qeyd edək ki, Dinara Əliyeva 17 dekabr 1980-ci ildə Bakıda anadan olub. O, Bakı Musiqi Akademiyasını, Xuraman Qasımovanın sinfini bitirib. Dinara Əliyeva Axundov adına Azərbaycan Opera və Balet Teatrının solisti olub, haradakı Verdinin "Trubadure" operasında Leonora, Verdinin "Traviata" operasında Violetta və Puççininin "Bohema" operasında Mimi rollarını ifa edib. 2009-cu ildə o, "Bolşoy Teatr"da Puççininin "Turandot" operasında Liu rolunda debüt edib. 2010-cu ildən bəri Əliiyeva Bolşoy Teatr Opera Truppasının solistidir.