ABŞ Prezidenti Donald Trampın administrasiyası Vaşinqtonun siyasətini dəyişdirə biləcək və Kubada hökumətə rəhbərlik edə biləcək hazırkı və ya keçmiş hökumət rəsmisini axtarır.

Bu barədə "The New York Times" mənbələrə istinadən məlumat yayıb.
Qəzetin yazdığına görə, ABŞ administrasiyası xüsusi xidmət orqanlarına Venesuelada Nikolas Maduronun hakimiyyətdən uzaqlaşdırılmasından sonra prezident səlahiyyətlərini icra edən Del­si Rodriqesə bənzər namizəd tapmağı tapşırıb.

Məlumata görə, ABŞ rəsmiləri Rodriqesi Vaşinqtonla əməkdaşlığa hazır olan və ölkənin idarəçiliyini problemsiz şəkildə üzərinə götürə biləcək praqmatik siyasətçi hesab ediblər.

ABŞ administrasiyasının bəzi nümayəndələri Kubada da belə praqmatik liderin tapıla biləcəyini düşünür. Lakin ABŞ kəşfiyyatının qiymətləndirməsinə görə, Kubanın Vaşinqtonla əməkdaşlığa hazır olmaması ölkəni Venesueladan daha çox İrana yaxınlaşdırır.