Avropada miqrasiya böhranının yenidən kəskinləşməsi fonunda radikal islamçı terror təhlükəsi ilə bağlı müzakirələr güclənib. Xüsusilə İspaniyanın Şimali Afrikadakı Seuta anklavında yaşanan son miqrant axını təhlükəsizlik məsələsini yenidən gündəmə gətirib.

“Fox News” yazır ki, Avropa ölkələrinin təhlükəsizlik qurumları son dövrdə radikallaşma və terror təşkilatları ilə əlaqəli şəxslərə qarşı əməliyyatları artırıb.

Avropa İttifaqının hüquq-mühafizə agentliyi Europolun 2026-cı il hesabatına əsasən, ötən il Aİ ölkələrində terrorla əlaqəli cinayətlərə görə ümumilikdə 486 nəfər saxlanılıb. Onlardan 347-si cihadçı terrorçuluqla bağlı cinayətlərdə şübhəli bilinib. İspaniya bu göstəriciyə görə Aİ-də ilk sırada qərarlaşıb: ölkədə cihadçı terrorçuluqla əlaqədar 100 nəfər həbs edilib. Bütün terror kateqoriyaları nəzərə alındıqda isə İspaniyada saxlanılanların sayı 117 nəfər olub.

“Europol” bildirib ki, 2025-ci ildə Aİ-də qeydə alınmış 45 tamamlanmış, uğursuz və ya qarşısı alınmış terror hücumunun 24-ü cihadçı terrorçuluqla əlaqəli olub. Bu hücumlar terror hadisələri arasında ən ölümcül kateqoriya hesab edilib: 5 nəfər həyatını itirib, 81 nəfər yaralanıb.