“Azərbaycan xarici siyasətində qonşu, region ölkələrlə münasibətlərin intensiv istiqamətdə inkişafı əsas prioritetlərdəndir. Bu siyasət nəticəsində ölkəmizin dinamik əlaqələri genişlənir”. Bu fikirləri xalqcəbhəsi.az-a açıqlamsında politoloq Züriyyə Qarayeva deyib. Z.Qarayeva bildirib ki, bu ölkələrdən biri də İsraildir: “Azərbaycan və İsrail xalqları arasında dostluq əlaqələrinin qədim tarixi var. 1810-cu ildə ilk aşkenazilərin Bakıda məskunlaşması ilə bu əlaqələr başlanğıcını götürüb. 1832-ci ildə isə yəhudilərin Bakıda ilk ibadət evləri inşa olunub. 1870-ci ildə Bakıda neft çıxarılmağa başladıqdan sonra Azərbaycana yəhudi biznesi nümayəndələrinin axını başlayıb”. Politoloq əlavə edib ki, Q.Polyak, A.Dembo, X.Kaqan, baron Q.Qinzburq, A.Feyqel bu ərazidə geniş fəaliyyət göstəriblər: “Bu xalqlar həmişə bir-birinin dilinə, dininə, mədəniyyətinə hörmətlə yanaşıb. Bakıda 3 yəhudi dini məbədi var. Azərbaycan dövlətinin bütün xalqlara və dinlərə tolerant münasibəti özünü yəhudilərə qarşı da yüksək səviyyədə göstərib”.

Əli