Avropanı qorumaq həm də sərhədlərimizdən kənarda sülhü, sabitliyi və beynəlxalq hüququ dəstəkləmək deməkdir. Məhz buna görə də Aİ təhlükəsizliyimiz baxımından Cənubi Qafqazda sabitliyi və onun çiçəklənməsini vacib hesab edir. Hər iki tərəfin gələcəyi bir-birinə bağlıdır.

Bunu Avropa İttifaqının Azərbaycandakı səfiri Mariyana Kyundziç “Avropa Günü” münasibətilə təşkil olunan tədbirdəki çıxışı zamanı deyib.

“Buna görə də biz Azərbaycan və Ermənistan arasındakı sülh prosesini, o cümlədən nəqliyyat infrastrukturunun inkişafı və minaların təmizlənməsi təşəbbüsləri vasitəsilə dəstəkləməyə davam edəcəyik ki, bu sahələrdə də Aİ artıq ən böyük donordur. İranın Azərbaycana son hücumundan sonra Aİ Azərbaycanın yanında olduğunu birmənalı şəkildə bildirdi. Naxçıvana qarşı qəbuledilməz hücumdan qısa müddət sonra Avropa İttifaqı Şurasının Prezidenti Antonio Koşta Bakıya səfər edərək Azərbaycan və onun xalqı ilə tam həmrəy olduğunu bildirdi. Xarici İşlər və Təhlükəsizlik Siyasəti üzrə Ali Nümayəndəmiz Avropa Komissiyasının vitse-prezidenti Kaya Kallas hücumdan dərhal sonra Azərbaycanın xarici işlər naziri Ceyhun Bayramovla telefon danışığında həmrəy olduqlarına dair eyni qətiyyətli mesajı çatdırdı”,- Kuyudziç bildirib.

O həmçinin, yüzlərlə Aİ vətəndaşının İrandan təxliyə edilməsində Azərbaycanın göstərdiyi dəstəyə görə təşəkkür edib.

“Azərbaycan kimi etibarlı tərəfdaşlarla əməkdaşlıq ortaq təhlükəsizliyimizi gücləndirir.

Bu il Azərbaycan ilə tərəfdaşlığımızın 30 ilini qeyd etdiyimiz üçün xüsusilə vacibdir. Otuz il əvvəl biz etimada, sabitliyə və ortaq tərəqqiyə əsaslanan tərəfdaşlığa qədəm qoyduq. İllər ərzində Azərbaycan Aİ üçün vacib və etibarlı enerji tərəfdaşına çevrilib, biz də ticarət sahəsində Azərbaycanın ən böyük tərəfdaşı və investoru olmaqdan qürur duyuruq.

Münasibətlərimiz dərinləşməyə davam edir. Bu il biz artıq Brüsseldən bir neçə yüksək səviyyəli qonaq, o cümlədən Avropa İttifaqı Şurasının Prezidenti Antonio Koştanı, Enerji və Mənzil məsələləri üzrə Komissar Dan Yorgenseni və ən son olaraq ittifaqın Ali Nümayəndəsi Kaya Kallası qəbul etdik.

Amma biz nailiyyətlərimizlə kifayətlənə bilmərik. Gələn həftə tərəfdaşlığımızda daha bir mühüm mərhələ qeyd olunacaq: Bakı 7-ci Aİ–Azərbaycan Təhlükəsizlik Dialoquna ev sahibliyi edəcək və Aİ nümayəndə heyəti Bakıda keçiriləcək Ümumdünya Şəhərsalma Forumunda iştirak edəcək.

Xoş təsadüf olaraq bu il ziyafətimizi Nizami Gəncəvi zalında keçiririk və bu ilki ənənəvi Avropa Şəhərciyi tədbirimiz iyun ayında gözəl Gəncə şəhərində baş tutacaq. Sizin hər birinizi bu tədbirə dəvət etmək istərdim və ümid edirəm ki, bir neçə həftə sonra sizin hamınızla orada görüşəcəyik”,- Aİ səfiri qeyd edib.