Sultan Qasımov: "Ermənistanda olan azərbaycanlı əsirin məktubunun konsulluğa təqdim edilməsi məlumatı yalandır"

"Sosial şəbəkələrdə Ermənistanda olan azərbaycanlı əsirin məktubunun konsulluğa təqdim edilməsi ilə bağlı yayılan məlumat kökündən yalandır".
Bunu APA-nın Moskva müxbirinə açıqlamasında Azərbaycan Rusiyanın Sankt-Peterburq şəhərindəki baş konsulu Sultan Qasımov bildirib.
Onun sözlərinə görə, belə bir hadisə baş verməyib: "Yayılan səs yazısında deyilənlərin hamısı yalandır. Qeyd olunur ki, guya Ermənistanda əsirlikdə olan azərbaycanlının meyvə yeşiyinin içində göndərdiyi məktub baş konsulluğa təqdim olunub. Baş konsulluqda 4-5 diplomat çalışır. Bunlardan 3 nəfər konsul, bir nəfər baş konsuldur. Məktub verilibsə, kimə təqdim olunub? Bizdə 24 saat videoçəkiliş gedir. Konsulluğa təqdim olunan bütün məktublar qeydə alınır. Məktubu təqdim edən şəxs videoya düşür. Bu, o qədər uydurma, yalan təxribat xarakterli bir məlumatdır ki, adam buna reaksiya verməyə belə çətinlik çəkir. İddia edənin adı, soyadı da yoxdur ki, ona müraciət edək. Mən, baş konsul kimi fürsətdən istifadə edib, məktubu baş konsulluğa təqdim etdiyini iddia edən şəxsə səslənirəm. Qoy, gəlsin baş konsulluğa. Biz burada 5-6 diplomat işləyirik. Gəlsin, girsin içəri, baxsın üzümüzə və desin ki, məktubu kimə verib. Axı, əgər məktub verilibsə, biz onu niyə gizlədək?! Əksinə, belə məktub varsa, bunu yayardıq, Ermənistanın əsirlikdə olan həmyerlilərimizin çəkdiyi iztirabları göstərərdik".
Diplomat Peterburqda yerləşən Sofiyskaya meyvə-tərəvəz bazasında çalışan həmyerlilərimizə də müraciət etdiklərini söyləyib: "Həmin meyvə-tərəvəz bazasında çoxlu sayda həmyerlilərimiz çalışır. Biz onlarla danışdıq. Onlar bildirdilər ki, əgər belə bir məktub olsaydı, biz azərbaycanlılar bundan dərhal xəbər tutardıq və bu məlumatı tez yayardıq. Bilinmir ki, məktub nə vaxt çıxıb, kim gətirib və kimə verib. Yenə deyirəm, məktubu gətirdiyini iddia edən adam gəlsin baş konsulluğa, məktubu kimə verdiyini desin. Belə bir məktubla insan bura gəlməyib".
Qeyd edək ki, dünən sosial şəbəkələrdə Ermənistanda əsirlikdə olan azərbaycanlılarla bağlı səs yazısı yayılıb. Həmin səs yazısında Sankt-Peterburqdakı meyvə-tərəvəz bazasında Ermənistandan gətirilən ərik yeşiklərində azərbaycanlı əsirlərin məktubunun aşkarlandığı və həmin məktubun Sankt-Peterburqdakı baş konsulluğumuza təqdim edildiyi bildirilib.