MSK sədri: “Bələdiyyə seçkiləri ilə bağlı bizə irad tutulmasın”
“Yaxın vaxtlarda bələdiyyə seçkilərinə hazırlıq işləri bitəcək”. Bunu Mərkəzi Seçki Komissiyasının (MSK) sədri Məzahir Pənahov dairə seçki komissiyalarının sədrləri üçün keçirilən müşavirədə deyib.
Onun sözlərinə görə, bu il dekabrın ikinci yarısında bələdiyyə orqanlarına seçkilər keçiriləcək.
M.Pənahov əlavə edib ki, bu seçkilərdə ölkədəki 1606 bələdiyyəyə 15 mindən artıq üzvün seçiləcəyi gözlənilir.
MSK sədri qeyd edib ki, seçkilərin keçirilməsi ilə əlaqədar müəyyən dövlət orqanlarının üzərinə də müəyyən öhdəliklər düşür.
“Yerlərdəki məntəqələr nümunəvi səviyyədədir, amma elə etməliyik ki, bizə seçkilərlə bağlı irad tutulmasın”-deyən MSK sözlərinə görə, dünyanın heç bir yerində ideal seçki siyahısı tərtib etmək mümkün deyil, bütün ölkələrdə seçki çatışmazlığı olur, amma əsas məsələ odur ki, bu, nəticəyə təsir edən çatışmazlıq olmasın.
M.Pənahov əlavə edib ki, ictimai-siyasi sabitlik seçkilərin keçirilməsi üçün vacib şərtdir: "Azərbaycanda müasir tələblərə cavab verən qanunvericilik bazası yaradılıb. Ölkədə demokratik seçkilərin keçirilməsi üçün şərait var. Ölkədə siyasi iradə olmasa, demokratik seçkilər keçirilə bilməz. Müəyyən dövrlərdə qarşıdurmaya cəhdlər olsa da, ölkə rəhbərliyi bütün gərginlikləri aradan götürüb. Bəziləri Azərbaycandakı seçkiləri bəyənmirlər, amma biz daim müzakirələr aparmaqla görülən işlərin nümunə olduğunu göstəririk".