Təbrizli jurnalist, yazıçı və media fəalı Zöhrə Vəfayinin anım günüdür.

Gunaz.tv

Zöhrə Vəfayi 1953-cü ildə Təbrizdə anadan olub.

İbtidai və ali təhsilini doğma şəhərində alan Vəfayi, gənc yaşlarından ədəbi-mədəni və media fəaliyyətlərinə başlayıb.

O, xüsusilə 1990-cı illərdə Təbrizdə nəşr edilən populyar türkcə-farsca Çuvalduz satirik dərgisinin naşiri və Zeynəb Paşa nəşriyyatının sahibi kimi tanınıb.

Zöhrə Vəfayi, türk dili, folkloru və ədəbiyyatı, eləcə də Güney Azərbaycanda tarix, mədəniyyət və sosial həyat sahələrində onlarla kitab yazıb.

Onun “Uşaq məktəbi”, “Azərbaycanın məşhurları” (5 cildlik), “Alqışlar və qarğışlar”, “El bayatıları”, “Oyunlar”, “Azərbaycanın məşhur yeməkləri”, “Peşələr”, “Laylalar”, “Qablar”, “Adlar və adlandırılanlar”, “Geyimlər”, “Ana”, “Ölçülər”, “Heydər Əmioğlu”, “Qarınqulu cücə”, “Axtar-tap” və “Məsəllər” kimi kitablar türk və fars dillərində işıq üzü görüb.

Vəfayi həmçinin türk dil hüquqları və siyasi məhbusları müdafiə sahəsində fəaliyyət göstərib. O, keçmiş illərdə göstərdiyi mədəni və siyasi fəaliyyətlərinə görə İranın təhlükəsizlik orqanlarının təhdid və təzyiqlərinə məruz qalıb.

Tanınmış yazıçı 22 sentyabr 2024-cü ildə xəstəlikdən dünyasını dəyişib, Təbrizin Vadi rəhmət qəbristanlığının sənətçilər bölməsində dəfn olunub.