Formula-1 rəhbərliyi Ruandada Qran-pri yarışının keçirilməsi ilə bağlı 10 illik müqavilə imzalayıb.

Afrika Qran-prisinin 2030-cu illərin əvvəlində çempionatın təqviminə daxil edilməsi planlaşdırılır. Bunun üçün ölkənin paytaxtı Kiqalidən təxminən 40 kilometr cənubda, Buqesere bölgəsində yeni daimi tras tikiləcək.

Formula-1 yarışları Afrikada sonuncu dəfə 1993-cü ildə keçirilib. Həmin vaxt Cənubi Afrikadakı Kyalami trası çempionatın mərhələsinə ev sahibliyi edib.

Formula-1-in prezidenti Stefano Domenikali bu qərarı tarixi hadisə adlandırıb:

“Bu gün Formula-1 üçün tarixi məqamdır. Növbəti onillikdə Ruandanın çempionatın təqviminə daxil olması ilə seriyamız bütün məskunlaşmış qitələrdə yarışlar keçirəcək. Bu, dünya çempionatını dünyanın hər yerindəki azarkeşlərə əvvəlkindən daha da yaxınlaşdıracaq”.