Ermənistan parlamentində 1999-cu ildəki terror aktı və ölkədəki 1 mart iğtişaşları ilə bağlı cinayət işləri bağlanmayıb.

Bu barədə ölkənin Baş prokuroru Anna Vardapetyan parlamentdə bildirib.

Vardapetyan qeyd edib ki, həmin işlərə baxılır, lakin illik hesabata daxil edilmir, çünki onların məzmunu ilə bağlı hələ heç bir məlumat verilmir.

“2008-ci ilin 1 mart tarixində baş vermiş iğtişaşlarla bağlı cinayət işi təxminən 800 cilddən ibarətdir. Bu cinayət işinin araşdırmasını bir müstəntiq aparır ki, o da ən azı həftədə bir dəfə məhkəmə prosesinin gedişi haqqında məlumat verir”, - o vurğulayıb.

Vardapetyan qeyd edib ki, Baş Prokurorluq isə 1999-cu ilin 27 oktyabrında parlamentdə baş vermiş terror aktı ilə bağlı işin təfərrüatlarını ilin ikinci yarısında təqdim etməyə hazırlaşır.