Hindistanın vitse-prezidenti Caqdip Dhankhar istefa verib.

“Report” xəbər verir ki, o, mətbuat xidməti vasitəsilə müvafiq açıqlama yayıb.

“Sağlamlığımı prioritetləşdirmək və həkimlərin tövsiyələrinə əməl etmək üçün mən Hindistanın vitse-prezidenti vəzifəsindən istefa verirəm”,- deyən Dhankhar prezidentə, baş nazirə, parlamentə və Nazirlər Kabinetinə birgə fəaliyyətlərinə görə təşəkkürünü bildirib.

Dhankharın avqustda 74 yaşı tamam olacaq. O, 2022-ci ilin avqustunda vitse-prezident vəzifəsini icra edib. Siyasətçi bu yaxınlarda Dehlidəki Bütün Hindistan Tibb Elmləri İnstitutunda angioplastika əməliyyatı keçirib.

Vitse-prezident eyni zamanda parlamentin yuxarı palatasının sədri vəzifəsini də icra edir. Hindistanın vitse-prezidenti dolayı yolla parlamentin hər iki palatasının nümayəndələrindən ibarət seçicilər kollegiyası tərəfindən gizli səsvermə yolu ilə seçilir. Səlahiyyət müddəti beş ildir.