Esmira Xəlilova: "Qonaqların içərisində xarici ölkələrin nüfuzlu siyasətçiləri, bir neçə ölkənin yüksək vəzifəli şəxsləri, parlament üzvləri də var"

Bu gün Bakıda Dünya Azərbaycanlılarının IV Qurultayı başlayır. Diasporla iş Üzrə Dövlət Komitəsinin mətbuat xidmətinin rəhbəri Esmira Xəlilovanın verdiyi məlumata görə, qurultay iştirakçıları iyunun 2-də, bu gün saat 15:00-da Fəxri xiyabanda görkəmli dövlət xadimi Heydər Əliyevin abidə kompleksini, Şəhidlər xiyabanında Azərbaycanın müstəqilliyi və ərazi bütövlüyü uğrunda həlak olmuş şəhidlərin məzarını və Türk əsgərlərinin anım kompleksini ziyarət edəcəklər. Komitə rəsmisi bildirib ki, Dünya Azərbaycanlılarının IV Qurultayının açılış mərasimi iyunun 3-də Heydər Əliyev Mərkəzində baş tutacaq. Qurultayı öz işini sabah rəsmi açılışdan sonra saat14:30-da "Fairmont" otelində davam etdirəcək.
Qurultayda 49 ölkədən 500-dən çox diaspor nümayəndəsi və qonaq iştirak edəcək. Qonaqların içərisində xarici ölkələrin Azərbaycana dost münasibəti ilə tanınan nüfuzlu siyasətçiləri, ictimai xadimləri, elm adamları və bir neçə ölkənin yüksək vəzifəli şəxsləri, parlament üzvləri də var. Xaricdən dəvət edilən qonaqlarla yanaşı, qurultayın işində Azərbaycanın müxtəlif dövlət və hakimiyyət strukturları, qeyri-hökumət təşkilatları, elm, təhsil, mədəniyyət və digər yaradıcı qurumların, siyasi partiyaların təmsilçilərindən ibarət 360 nəfərlik nümayəndə heyəti də işitirak edəcək.
İclaslarda diaspor rəhbərləri müasir dövrdə informasiya müharibəsi, bu sahədə yeni fəaliyyət mexanizmlərinin tətbiqi, Azərbaycan diaspor hərəkatında gənclərlə bağlı yeni strategiyanın hazırlanması, yeni qlobal iqtisadi tendensiyalar fonunda lobbi quruculuğu, cəmiyyətə inteqrasiya, siyasi həyatda iştirak və digər bu kimi əhəmiyyətli mövzularda fikir mübadiləsi aparacaq, rəy və təkiliflərini səsləndirəcəklər.
Dünya Azərbaycanlılarının IV Qurultayında priotitet məsələlər Azərbaycan həqiqətlərinin dünya ictimaiyyətinə çatdırılması sahəsində qarşıda duran vəzifələr, təbliğat işində müasir metodların və informasiya texnologiyalarının tətbiqi, soydaşlarımızın hüquq və azadlıqlarının qorunması istiqamətində mövcud olan problemlər və onların həlli yolları, eləcə də digər məsələlər olacaq.
Tədbir çərçivəsində Azərbaycan diasporu nümayəndələrinin Azərbaycanın dövlət və hökumət strukturlarının rəhbərləri ilə görüşü də planlaşdırılır.
Görüşdə xaricdə yaşayan soydaşlarımızın problemlərinin həlli ilə bağlı müvafiq dövlət strukturlarının üzərinə düşən vəzifələr müzakirə ediləcək.
Qurultayın yekununda bir neçə sənədin qəbulu gözlənilir. Qurultay işini iyunun 4-də yekunlaşdıracaq.
Xatırladaq ki, Dünya Azərbaycanlılarının I Qurultayı 2001-ci ilin noybarın 9-10-da Bakı şəhərində keçirilib. II Qurultay 5 il sonra - 2006-cı il martın 16-da baş tutub. Dünya Azərbaycanlılarının III Qurultayı isə 2011-ci ilin iyul ayının 5-6-da keçirilib.