Abid Şərifov: "Bakıda FHN-in rəyi olmadan istismara verilən 100-ə yaxın bina var"

Fövqəladə Hallar Nazirliyinin (FHN) müvafiq rəyi olmadan istismara verilən binaların sayında ciddi azalma müşahidə olunur.
Bunu baş nazirin müavini Abid Şərifov deyib.
Baş nazirin müavini deyib ki, təkcə Bakı şəhərində 6-7 ay bundan öncə bu cür binaların sayı 300-ə yaxın olub: "Bu məsələ Nazirlər Kabinetində aidiyyatı qurumların nümayəndələri ilə keçirilən görüşdə müzakirə olundu və görülən tədbirlər nəticəsində hazırda bu cür binaların 100-ə enib. Bu istiqamətdə ciddi işlər aparılır. Bu sahədə problemlər var. Məsələn, bəzi binalar yarımçıq tikilib, bəzilərinin lifti yoxdur, digərlərində başqa çatışmazlıqlar var".
Tarixi binaların sökülməsinə münasibət bildirən baş nazirin müavini bunları deyib: "Bəzi tarixi binalar var ki, fasadında cəmi 3-4 dənə ağ daş qalıb. Prezidentimiz tarixi binalara münasibətini Fizuli küçəsindəki binanı sürüşdürmək barədə qərar verərkən göstərib.Sürüşdürmə xərcləri həmin evin dəyərindən dəfələrlə artıq olub.
"Sovetski"də söküntü ərazisinə düşən cəmi 23 tarixi bina var. Onlar da guya tarixidir. Biz mütəxəssislərlə qərara gəldik ki, o binalar söküləcək, onların yerləşdiyi küçələr genişlənəcək".