"ABŞ prezidenti Barak Obama Azərbaycan prezidenti İlham Əliyevi 2016-cı ildə Vaşinqtonda keçiriləcək IV Nüvə Təhlükəsizliyi Sammitinə dəvət etdikdən sonra Rusiyanın əlaltıları və agenturası yenidən Azərbaycan mətbuatında görünməyə başlayıb".
Bunu Bütöv Azərbaycan Xalq Cəbhəsi Partiyası (BAXCP) sədrinin müavini Niyaməddin Orduxanlı Milli Şuranın fəxri sədri Rüstəm İbrahimbəyovun ölkədəki vəziyyətlə bağlı çıxışına münasibət bildirərkən söyləyib.
Orduxanlı bildirib ki, indiyədək Rüstəm İbrahimbəyov mətbuatda yoxa çıxmışdı: "İndi nə baş verdi ki, Rüstəm İbrahimbəyov görünməyə başlayıb? Xatırlayırsınızsa, bu adam mətbuata acıqlama belə vermirdi. Ancaq kino işi ilə məşğul olduğunu və daha siyasətlə maraqlanmadığını qeyd edirdi. Ümumiyyətlə, Azərbaycan cəmiyyəti İbrahimbəyovu Rusiyaya xidmət göstərən şəxs kimi tanıyır. Düşünürəm ki, Rusiya növbəti dəfə Rüstəm İbrahimbəyov və bu tipli adamlardan istifadə edərək Azərbaycan dövlətinə və onun hakimiyyətinə qarşı təzyiq edir".
Niyaməddin Orduxanlı qeyd edib ki, Rusiya ABŞ-Azərbaycan münasibətlərinin gərgin olmasında maraqlıdır: "Rusiya Azərbaycanla ABŞ arasında münasibətlərin normallaşmasını istəmir. Ona görə də Rüstəm İbrahimbəyov kimi adamların yenidən mətbuatda görünməsini təbii qarşılamaq lazımdır".