Azərbaycan səfirliyində Demokratik Respublikasının yaranmasının 96-cı ildönümü münasibətilə qəbul təşkil olunub

Almaniyadakı Azərbaycanlıların Koordinasiya Mərkəzində (AAKM) 28 May - Azərbaycan Respublikasının 96-cı ildönümünə həsr edilmiş gecə təşkil olunub.
Diasporla İş üzrə Dövlət Komitəsinin mətbuat xidmətindən APA-ya verilən məlumata görə, tədbiri AAKM-nin icraçı direktoru Samira Patzer-İsmailova giriş sözü ilə açaraq 1918-ci il mayın 28-də qurulan Azərbaycan Demokratik Respublikası, onun tarixi və iki ildən sonra bolşevik Rusiyası tərəfindən süquta yetirilməsi haqqında məlumat verib. O, yenidən bərqərar olmuş 23 illik istiqlaliyyətin müvəffəqiyyətlərini tarixi ənənələrin davamı kimi qiymətləndirib.
Tədbirdə çıxış Azərbaycanın Almaniyadakı səfirliyinin birinci katibi Fikrət Axundov isə 1991-ci il oktyabrın 18-də Azərbaycanın müstəqilliyinin bərpa edilməsindən sonra iqtisadi və sosial sahələrdə qazandığı uğurlar, eləcə də siyasi aləmdə tutduğu mövqedən danışıb. Fikrət Axundov bu istiqamətdə Almaniyadakı Azərbaycan diasporunun fəaliyyətini və keçirilən tədbirləri müsbət dəyərləndirib.
Tədbirin bədii hissəsinin qonağı Berlində yaşayan rejissor və aktrisa Naiba Tural Azərbaycan ədəbiyyatından seçilmiş şerləri ifa edib.
Gecənin bədii hissəsi rejissor və rəssam Şamil Nəcəfzadənin "Sirli bənövşə" qısametrajlı filminin nümayişi ilə davam edib. Film Xll əsrdə yaşayıb-yaratmış Azərbaycanın görkəmli qadın şairələrindən biri Məhsəti Gəncəvinin həyat və yaradıcılığından bəhs edir. Filmin nümayişindən sonra müasir Azərbaycanı əks etdirən qısa çarxlar göstərilib, Azərbaycan musiqisi səsləndirilib.
Azərbaycanın Almaniyadakı səfirliyində isə Azərbaycan Demokratik Respublikasının yaranmasının 96-cı ildönümü münasibətilə qəbul keçirilib. Səfirliyin mətbuat xidmətindən verilən məlumata görə, tədbirə Almaniyanın ictimai-siyasi həyatının, elmi və mədəni dairələrinin, AFR XİN-in, Bundestaqın, xarici diplomatik korpusun, Azərbaycan diasporunun nümayəndələrindən ibarət təxminən 450 nəfər qonaq qatılıb. Tədbirdə əvvəlcə Azərbaycan və Almaniyanın dövlət himnləri səsləndirilib. Daha sonra Azərbaycanın AFR-dəki fövqəladə və səlahiyyətli səfiri Pərviz Şahbazov salamlama nitqi ilə çıxış edib. Səfir Pərviz Şahbazov hazırda regionda tam müstəqil xarici siyasət yürüdən ölkəmizin uğurlarından, beynəlxalq arenada artan rolundan, Azərbaycan-Almaniya münasibətlərinin hərtərəfli inkişafından, eləcə də Dağlıq Qarabağ münaqişəsindən danışıb.
Daha sonra tədbir iştirakçıları ziyafətə dəvət olunublar.