Təqdimat mərasiminə Ukraynanın yeni prezidenti Pyotr Poroşenko da qatılıb

Krım tatarlarının lideri Mustafa Cəmilov iyunun 3-də Polşa XİN tərəfindən ölkədə ilk azad parlament seçkilərinin 25-ci ildönümü ilə əlaqədar təsis edilmiş "Həmrəylik Mükafatı" ilə təltif olunub.
APA-nın "UNİAN"a istinadən verdiyi xəbərə görə, mükafatı Varşavada laureata Polşa prezidenti Bronislav Komorovski və ölkənin keçmiş rəhbəri Lex Valensa təltif etmə mərasiminə gəlmiş onlarla dövlət liderlərinin iştirakı ilə təqdim edib.
"Mən Lex Valensa ilə birlikdə Mustafa Cəmilova bu mükafatı təqdim etməkdən şərəf hissi duyuram. Bu mükafat vasitəsilə biz Avropa həmrəyliyimizi nümayiş etdirmək imkanı əldə etdik", deyə Komarovskiy bildirib.
"Dinc mübarizənizə görə sizə çox minnətdarıq və sizdən bundan sonra da mübarizə aparmağı xahiş edirik. Bu mükafat sizi mübarizəyə daha da sövq etməlidir. Mən şəxsən əminəm ki, qələbə nəhayət qazanılacaq", deyə Valensa əlavə edib.
Qeyd edək ki, mərasimdə laureatdan başqa həmçinin Polşa XİN rəhbəri Radoslav Sikorski, İsveç XİN rəhbəri Karl Bildt və Ukraynada prezident seçkilərinin qalibi Pyotr Poroşenko da çıxış ediblər.
Natiqlər demokratiya və vətəndaş hüquqları naminə mübarizə sahəsində Mustafa Cəmilovun xidmətlərini yüksək qiymətləndiriblər.