“AİB liderləri üçün Serj Sarkisyan mövcud deyil” Dünya

“AİB liderləri üçün Serj Sarkisyan mövcud deyil”

Deutsche Welle: "Ermənistana həbsxana paltarı geyindiriblər"

Cavid

Ermənistan Avrasiya İqtisadi Birliyinə lazımdırsa, bəs nədən Serj Sarkisyan bu qurumun iclaslarına dəvət edilmir? Bu suala cavab tapmaq üçün Almaniyanın "Deutsche Welle" radiostansiyasının müxbiri İrəvanda olub və araşdırma aparıb.
Müxbir qeyd edib ki, Ermənistanın Avrasiya İqtisadi Birliyinə qəbul edilməsindən artıq 3 ay keçib: "Ancaq bu 3 ay ərzində yenə də bir çox suallar cavabsız qalır.
Serj Sarkisyan Moskvanın təhdidlərindən söz açıb. Mart ayının 18-də İrəvan şəhərində keçirilən mediaforumda o, Moskva jurnalistinin sualına cavab verərkən deyib ki, Rusiyanın Azərbaycana silah satması onu bərk narahat edir.
Sarkisyanın fikrincə, sərhəddə duran erməni əsgər bilir ki, onu Rusiya silahı vasitəsilə öldürmək istəyirlər.
Mart ayının 21-də isə Sarkisyan "France Presse" agentliyinə verdiyi müsahibəsində bildirib ki, Putin aprel ayının 24-də "erməni soyqırımı"nın 100 illiyi ilə bağlı keçiriləcək tədbirə qatılmayacaq.
Mart ayının 20-də Sarkisyan Astanaya dəvət edilməmişdi, ancaq onun həmkarları Putin, Nazarbayev və Lukaşenko o görüşdə Valyuta Birliyini müzakirə etmişdilər.
Ermənistanı bilərəkdənmi oyundan kənarda saxlayırlar?
Ermənistan parlamentinin spikeri isə Astana görüşü ilə bağlı deyib ki, o tədbir Avrasiya İqtisadi Birliyinin tədbiri olmayıb.
Bu fikir isə erməni siyasətçiləri tərəfindən ciddi tənqid edilib.
Mart ayının 27-də "Ermənistan Milli Konqresi" müxalifət partiyası fraksiyasının katibi Aram Manukyan vurğulayıb ki, Rusiya, Qazaxıstan və Belarus liderləri üçün Serj Sarkisyan mövcud deyil.
Belə çıxır ki, Ermənistana həbsxana paltarı geyindiriblər".
Ermənistanın Siyasi Beynəlxalq Araşdırmalar Mərkəzinin eksperti Ruben Meqrabyan isə qeyd edib ki, Ermənistanı çoxları Avrasiya İqtisadi Birliyinin "yoxsul qohumu" və yaxud "5-ci təkər"i adlandırırlar: "Ancaq bu, belə deyil. Vəziyyət göründüyündən də daha pisdir. İrəvanı həbsxananın tək kamerasına salıblar. Ermənistan Rusiya üçün regiona təsir etmək üçün bir meydançadır. Hazırda xarici investorlar Ermənistana sərmayə qoymurlar. Ermənistan mallarının Rusiyaya ixracı ilin əvvəlindən 4 dəfə aşağı düşüb. Bunun qarşılığında rəsmi Moskva ermənilərin Rusiyaya miqrasiyasını asanlaşdırırlar".