2 polis əməkdaşı qəhrəmancasına həlak oldu, cinayətkar dəstənin 4 üzvü məhv edildi, 14 üzvü isə saxlanıldı

Dünən Nardaran qəsəbəsində xaricdən idarə olunan ekstrimist dini qrupun üzvlərinə qarşı həyata keçirilən əməliyyatda cinayətkar dəstənin 4 üzvü məhv edilib, 2 polis əməkdaşı qəhrəmancasına həlak olub.
Azərbaycan Respublikası Daxili İşlər Nazirliyi və Baş Prokurorluq baş verən silahlı insidentlə bağlı birgə məlumat yayıb.
Məlumatda deyilir ki, respublikada ictimai-siyasi sabitliyi pozmağı, təxribatlar, kütləvi iğtişaşlar, terrorçuluq aktları törətməyi planlaşdıran və din pərdəsi altında fəaliyyət göstərən silahlı cinayətkar dəstə barədə Daxili İşlər Nazirliyinə daxil olmuş məlumat aparılan araşdırmalarla təsdiqlənmiş və təxirəsalınmaz əks tədbirlərin görülməsini zəruri etmişdir.
Müəyyən olunmuşdur ki, Taleh Kamil oğlu Bağırov, Elman Seydəmir oğlu Ağayev, Zülfüqar Sədrəddin oğlu Mikayılov və Əbülfəz Heydət oğlu Bünyatov dövlətin konstitusiya quruluşunun zorla dəyişdirilməsi, şəriət qanunları ilə idarə edilən dini dövlət qurulması məqsədilə "Müsəlman birliyi" adlı hərəkat yaratmışlar. Adları çəkilən şəxslər Bakı şəhərindən və respublikanın digər bölgələrindən özlərinə tərəfdarlar toplamış, onları müxtəlif növ odlu silah, döyüş sursatı, partlayıcı maddə və qurğularla təchiz edərək cinayətkar dəstə təşkil etmişlər. Həmçinin, paytaxtın Nardaran qəsəbəsində qanunsuz yığıncaqlar keçirərək respublikanın əhalisini hakimiyyətə qarşı qaldırmağın yollarını müzakirə etmiş, bununla bağlı tərəfdarlarına göstərişlər vermiş və əhaliyə çağırış vərəqələri paylamışlar. Silahlı cinayətkar dəstənin hər bir üzvünün üzərinə düşən konkret vəzifələr, o cümlədən hakimiyyət nümayəndələrinə qarşı terror aktları törədəcək məsul şəxslər müəyyən edilmişdir.
Qeyd edilənlər nəzərə alınaraq həmin şəxslərin tutulması məqsədilə,2015-ci il noyabrın 26-da Daxili İşlər Nazirliyi tərəfindən Bakı şəhərinin Nardaran qəsəbəsində xüsusi əməliyyat keçirilmişdir. Əməliyyat zamanı polis əməkdaşlarına silahlı müqavimət göstərilərək avtomat silahlardan atəş açılmış, əl qumbarası atılmışdır. Hücum edənlərin davamlı atəşinə cavab olaraq xüsusi əməliyyat qrupu tərəfindən xidməti silahdan istifadə edilməklə cinayətkar dəstənin 4 üzvü məhv edilmiş, daha bir neçə nəfəri yaralanmışdır.
Əməliyyatın keçirildiyi ərazidə, silahlı cinayətkar dəstənin tərəfdarlarının çoxalmasına baxmayaraq, polis işçiləri öz xidməti vəzifələrini sonadək mərdliklə yerinə yetirmiş, 2 əməkdaş qəhrəmancasına həlak olmuşdur.
Hadisə yerindən maddi sübut kimi xeyli sayda avtomat silah, əl qumbarası, soyuq silahlar və s. götürülmüşdür. Cinayətkar dəstənin, Taleh Bağırov başda olmaqla, 14 üzvü saxlanılaraq istintaqa təqdim edilmişdir. Fakt üzrə Azərbaycan Respublikasının Baş Prokurorluğu tərəfindən cinayət işi başlanılaraq istintaq aparılır.
Cinayətin bütün iştirakçılarının, o cümlədən bu silahlı cinayətkar dəstəyə köməklik edən şəxslərin müəyyən edilib tutulması və məsuliyyətə cəlb edilməsi üçün əməliyyat-axtarış tədbirləri və istintaq hərəkətləri həyata keçirilir.
Ölkənin hüquq mühafizə və xüsusi xidmət orqanları tərəfindən bu cür hadisələrin qarşısının vaxtında alınması, formalaşan istənilən mütəşəkkil cinayətkar dəstənin və ya cinayətkar birliyin dərhal zərərsizləşdirilməsi istiqamətində tədbirlər bundan sonra da qətiyyətlə davam etdiriləcəkdir.



Ekstrimistlər jurnalistləri döydülər

Qəsəbəyə çəkilişə gələn "Azad Azərbaycan" Televiziyasının (ATV) avtomobilinin üzərinə bir neçə nəfər hücum edib. Avtomobil daşa basılıb, sürücüsü isə döyülüb. Bir neçə nəfər "Report" İnformasiya Agentliyinin avtomobilinə də hücum etmək istəyib. Lakin sürücü Müşfiq Novruzov ərazidən uzaqlaşa bilib.
Daş-dəyənəklə silahlanan naradanlıların hücumu zamanı AzVision.az-ın fotoqrafı Elvin Abdulla xəsarət alıb.
Etirazçılar tərəfindən vəhşicəsinə döyülən əməkdaşımızın fotoaparatı əlindən alınaraq sındırılıb.
Müxbirimiz Hafiz Əhmədov da sakinlər tərəfindən təzyiqlərə məruz qalıb. Onun sözlərinə görə, Nardaran sakinləri jurnalistləri təhqir edir, onların fəaliyyətinə imkan vermir.


Armatur, dəyənək və Molotov kokteyli

Dünən Nardaranda baş verən silahlı insidentdən sonra bir qrup radikal şəxs "İmam Hüseyn" meydanı adlanan əraziyə toplaşıb.
Onlar qəsəbəyə aparan yollara daş tökərək bağlayıb, qəsəbəyə kənar şəxsləri, o cümlədən jurnalistlər buraxmayıblar. Meydanın ətrafına toplaşmış bir qrup şəxs armatur, lom və dəyənəklərlə silahlanıb. Radikal ekstrimistlərin azadlıqda olan üzvləri hüquq-mühafizə orqanlarının təmsilçilərinə qarşı müqavimət göstərmək üçün Molotov kokteyli hazırlayıblar.
Radikallar qəsəbə sakinlərini də onlara qoşulmağa tələb edib, onların çağırışlarına məhəl qoymayanları isə hədələyiblər.