Dünən Kütləvi İnformasiya Vasitələrinin İnkişafına Dövlət Dəstəyi Fondunda (KİVDF) Beynəlxalq Final Universitetinin rektoru Abdullah Öztoprak ilə görüş keçirilib. Görüşdə Şimali Kipr Türk Respublikasının Azərbaycandakı sabiq nümayəndəsi Zeki Qazioğlu, KİVDF-nin icraçı direktoru Vüqar Səfərli, ölkənin aparıcı KİV-nin rəhbərləri iştirak ediblər.
Tədbiri giriş sözü ilə açan KİVDF-nin icraçı direktoru Vüqar Səfərli qeyd edib ki, Azərbaycan ilə Şimali Kipr Türk Respublikası arasında təhsil sahəsində sıx əlaqələr var: "Şimali Kipr Türk Respublikasında xeyli sayda azərbaycanlı tələbə təhsil alır:" Abdulla Öztoprak əvvəllər Doğu Akdeniz Universitetinin rektoru olsa da, hazırda yeni fəaliyyətə başlayan Beynəlxalq Final Universitetinin rektorudur. Abdulla bəy bir neçə dəfə Azərbaycanda olub və media orqanlarının rəhbərləri ilə görüşüb. Bu səfər isə Abdulla Öztoprakın Beynəlxalq Final Universitetinin rektoru kimi ölkəmizə ilk səfəridir. Mən əminəm ki, yeni fəaliyyətə başlayan Beynəlxalq Final Universitetində də qısa zamanda Abdulla Öztoprakın təcrübəli fəaliyyəti sayəsində Azərbaycandan tələbələr təhsil alacaq". Daha sonra çıxış edən Abdulla Öztoprak rəhbərlik etdiyi, yeni fəaliyyətə başlayan universitetlə bağlı məlumat verdi:" Mən Doğu Akdeniz Universitetində yeni fəaliyyətə başlayanda Azərbaycandan orada 37 tələbə təhsil alırdı. Qısa zamanda bu rəqəm 450-ə çatdı. Mən inanıram ki, bizim yeni fəaliyyətə başlayan Beynəlxalq Final Universitetində təhsilin keyfiyyətinə Azərbaycan vətəndaşlarında inam yaranacaq. Çünki, bizim universitetdə priotet məsələ təhsilin keyfiyyətidir. Universitetdə ixtisaslar da əmək bazarında tələbat olan peşələrdir". KİV rəhbərləri də Abdulla Öztorpağa fəaliyyətlərində uğurlar arzuladılar.
Vüqar Səfərli bundan sonra da bu əlaqələrin daha da inkişaf etdirilməsinin vacibliyinin vurğulayaraq qarşılıqlı səfərlərin əhəmiyyətini qeyd edib.
Görüşdə "Bakı xəbər" qəzetinin baş redaktoru Aydın Quliyev, "Olaylar" informasiya agentliyinin və eyni adlı qəzetin baş redaktoru Yunus Oğuz, "Mövqe" qəzetinin baş redaktoru Rasim Bayramov, "Trend" İnformasiya Agentliyi baş direktorunun müavini Arzu Nağıyev və digər KİV rəhbərləri çıxış edərək öz təkliflərini səsləndiriblər.