Əlbəttə ki, bu mövzu ilə bağlı mövcud vəziyyət narahatedicidir. Bu cəhətdən Ədliyyə Nazirliyi və Qeyri-Hökumət Təşkilatlarına Dövlət Dəstəyi Agentliyinin
bəzi qeyri-hökumət təşkilatlarının qanunsuz şəkildə saxta orden və medallar təsis etməsi və təqdim etməsi ilə bağlı yaydığı birgə bəyanat tamamilə başadüşüləndir və onlar bu mövqedən haqlı olaraq çıxış ediblər.

Bunu "Xalq Cəbhəsi"nə “Demokratik Azərbaycan Naminə” İctimai Birliyin (DANİB) sədri Elməddin Behbud deyib.

"Ona görə də biz DANİB olaraq hər iki dövlət qurumunun QHT-lərin medal və ordenlə təltifetmə işinin birdəfəlik dayandırılması ilə bağlı mövqeyini dəstəkləyirik və qanunun aliliyinin təmin olunmasını vacib hesab edirik" - QHT sədri deyib.

Onun sözlərinə görə, QHT-lərin üzərinə maarifləndirmə, ictimai nəzarət, ictimai problemlərin həlli ilə bağlı təşəbbüskarlıq kimi mühüm missiya düşür. Bundan kənar məsələlərlə məşğul olmağa çalışmaq doğru deyil: "İnanıram ki, dövlət qurumlarının müvafiq çağırışı bu sahədəki bütün uyğunsuzluğun aradan qalxması ilə nəticələnəcək".

Cavid