ABŞ Dövlət Departamenti Yəmənin şiə "Ənsar Allah" (husilər) hərəkatının gərginliyi artırması fonunda Səudiyyə Ərəbistanında çalışan amerikalı diplomatlar üçün yeni məhdudiyyətlər tətbiq edib.

Xalqcebhesi.az xəbər verir ki, bu barədə ABŞ-ın Ər-Riyaddakı səfirliyinin saytında məlumat verilib.

İndi amerikalı dövlət qulluqçuları Dammam və Ciddə şəhərlərinin hava limanlarından istifadə etmək üçün xüsusi icazə almalıdırlar. Dünən Dövlət Departamenti Ər-Riyaddakı Kral Xalid adına Beynəlxalq Hava Limanının istifadəsinə də analoji məhdudiyyətlər qoymuşdu.

Həmçinin qurum ABŞ vətəndaşlarına hava nəqliyyatından istifadə etməməyi, avtomobil və ya qatarlarla hərəkət etməyi tövsiyə edib.

Oktyabrın 11-də Ər-Riyad hava limanına edilən hücum nəticəsində 1 nəfər həlak olub, 11 nəfər yaralanıb. Oktyabrın 10-da isə eyni hava limanına endirilən zərbələr nəticəsində azı 12 nəfər həyatını itirib, 300-dən çox insan xəsarət alıb.

Məryəm Quliyeva