"V Bakı Beynəlxalq Humanitar Forumu müasir zəmanədə baş verən hadisələrin və mürəkkəb məsələlərin həllində böyük əhəmiyyətə malikdir". Bunu TASS informasiya agentliyinin Baş direktorunun birinci müavini Mixail Qusman deyib.
O bildirib ki, forumun ən vacib hissəsi onun çərçivəsində təşkil edilən dəyirmi masalardır: "Budəfəki forumda təşkil olunan dəyirmi masaların birinin məhz müasir jurnalistikaya həsr edilməsi bizim üçün xüsusi əhəmiyyətə malik idi. Bu gün dünyada inkişaf edən informasiya texnologiyaları istər-istəməz jurnalistika sahəsinə təsirsiz ötüşmür. İnformasiya imkanlarımız müasir dünya çağırışlarına uyğun gəlməlidir. İnternet, sosial şəbəkələr, eləcə də digər vasitələrin hər biri jurnalistikaya öz təsirini göstərməkdədir. Forumun jurnalistika sahəsinə həsr edilən dəyirmi masasında bu məsələlərə xüsusi diqqət ayrıldı və mütəxəssislər bu sahədə mövcud problemlər haqqında öz dəyərli fikirlərini söyləyərək, dünyada baş verən proseslərin onların sahəsinə təsirsiz ötüşmədiyini dilə gətirdilər. Təbii ki, forum çərçivəsində aparılan müzakirələr psixoloji xarakter daşıyır, sonda söz jurnalistlərindir. Jurnalistlər üçün fəaliyyətlərini müasir dünya çağırışlarına uyğunlaşdırmaq çox vacibdir. Bu baxımdan burada müzakirə olunan məsələləri Bakı Forumunun böyük yatırımı hesab etmək olar".
M. Qusman əlavə edib ki, ümumiyyətlə Bakı Forumu beynəlxalq əlaqələr üçün də ən yaddaqalan məkandır: "Forumda bir çox sahələri əhatə edən Nobel mükafatçıları, kulturoloqlar və tanınmış elm, mədəniyyət və siyasət adamlarının iştirakı bir çox məsələlərin həllində böyük rol oynayır".