“Cavabdeh şəxslər cəzalandırılmalıdır” Siyasət

“Cavabdeh şəxslər cəzalandırılmalıdır”

Qüdrət Həsənquliyev: "Vəziyyət onu göstərir ki, neftçilərin qaldığı həmin estakadalar çox köhnəliblər, qəzalı vəziyyətdədirlər"

Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev dekabrın 15-də Xəzər dənizindəki "Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsində yerləşən estakadada baş verən hadisəyə münasibət bildirib.
BAXCP sədri deyib ki, baş verən hadisədə təqsirli olan şəxslər mütləq cəzalandırılmalıdır: "Bu məsələni çalışıb Milli Məclisin plenar iclasında da qaldıracam. Hesab edirəm ki, artıq Milli Məclis bu məsələyə öz münasibətini bildirməlidir. Çünki bu qısa müddət ərzində artıq üçüncü ciddi qəzadır ki, baş verir. Hər üç qəzada böyük insan itkisi müşahidə olunub. Bütün bunlar da onu göstərir ki, həmin yerlərdə təhlükəsizlik məsələləri ilə bağlı çox ciddi problemlər mövcuddur. Çox təəssüf ki, Dövlət Neft Şirkətinin təhlükəsizliyə məsul olan şəxsləri indiyədək ciddi şəkildə məsuliyyətə cəlb olunmayıblar. Əgər bu cür səhlənkarlığa yol verən şəxslər ilk gündən cəzalandırılsaydı, bəlkə də sonrakı hadisələr baş verməzdi".
Qüdrət Həsənquliyev baş verən hadisə ilə bağlı hökumətə də çağırış edib:
"Baş verən bu hadisə ilə bağlı hökumət çox ciddi qərarlar qəbul etməlidir. Vəziyyət onu göstərir ki, neftçilərin qaldığı həmin estakadalar çox köhnəliblər, qəzalı vəziyyətdədirlər. Ona görə də küləkli havalarda bu cür qəzalar baş verir. Ən azından küləkli havalarda həmin insanlar ərazidən evuakasiya olunmalı idi. Əgər bu edilmirsə və yaxud da edilən müraciətlərə səhlənkarlıq göstərilirsə, bununla bağlı ciddi tədbirlər görülməlidir. Əvvəlki hadisələr zamanı da müraciətlər edilmişdi. Ancaq baş verən son hadisə göstərdi ki, heç bir tədbir görülməyib. Bütün bunlara görə də hesab edirəm ki, həmin sahəyə cavabdeh olan şəxslər mütləq məsuliyyət daşımalıdır".