“Cənab Prezident İlham Əliyevin müsahibəsində ən vacib məsələlərdən biri köhnə dünya düzəninin, beynəlxalq münasibətlər sisteminin artıq işləməməsi, yeni düzənin isə formalaşmamasıdır. Bu düzən yeni yaranma mərhələsindədir. Məsələnin başqa bir tərəfi ondan ibarətdir ki, cənab Prezidentimiz söylədi ki, yeni dünya düzənində Türk Dövlətləri Təşkilatı (TDT) güc mərkəzi olmalıdır, onun böyük potensialı var”.

Bunu xalqcəbhəsi.az-a açıqlamasında Milli Məclis sədrinin müavini Musa Qasımlı söyləyib.

M.Qasımlı müsahibədə Fransanın Ermənistanı silahlandırması və bütövlükdə Makron siyasətinin uğursuz olmasının bir daha göstərildiyini diqqətə çatdırıb: “Prezident İranın davranışları məsələsinə aydınlıq gətirdi. Heç şübhəsiz, bu davranış mehriban qonşuluq münasibətlərinin ruhuna ziddir. Hər hansı bir əyalət mollasının Azərbaycanı təhqir etməsi onların tərbiyəsindən xəbər verir və özlərinə aiddir. Belə şəxslərin iki ölkə arasında münasibətlərə xələl gətirməsinə imkan vermək olmaz”.

Vitse-spiker həmçinin bildirib ki, 2025-ci il Azərbaycan üçün uğurlu olacaq: “Çünki ətrafımızda böyük dəyişikliklər baş verir. Ən başlıcası ondan ibarətdir ki, Ermənistanın yaxın dostu olan Suriyada Bəşər Əsəd rejimi devrilib. Ermənistanı terrorçularla təhciz edən bir şəxsin qovulması rəsmi İrəvanın mövqelərinin daha da zəifləməsidir. Yeni ildə Azərbaycanı böyük uğurlar gözləyir. Hər şey planlı şəkildə həyata keçirilir və cənab Prezident İlham Əliyevin müsahibəsi bir daha göstərdi ki, Azərbaycan qarşısına qoyduğu hədəflərə çatır. Çünki dövlət başçısı gücünü millətdən alır, millət də dövlət başımıza inanır”.

Röya İsrafilova