Elmar Məmmədyarov: "Ölkələrin beynəlxalq səviyyədə tanınmış sərhədləri dəyişdirilə bilməz"
Ştefan Füle: ""Şərq tərəfdaşlığı" ölkələrinin suverenliyi, ərazi bütövlüyü və müstəqilliyi Avropa üçün vacibdir"
Helqa Şmidt: "Dondurulmuş münaqişələr həll olunmalıdır"

"Bakıda keçirilən görüşdə "Şərq tərəfdaşlığı"nın bütün ölkələri qeyd etdilər ki, proqramın üzvü olan ölkələrin hər birinin ərazi bütövlüyü və suverenliyi tərəfdaş ölkələrin ərazisindəki sabitliyin əsas şərtlərindən biridir".
Bu barədə çərşənbə axşamı Bakıda Aİ-nin "Şərq tərəfdaşlığı" proqramının iştirakçısı olan ölkələrin XİN rəhbərlərinin dördüncü qeyri-rəsmi görüşündən sonra keçirilən brifinqdə Azərbaycanın xarici işlər naziri Elmar Məmmədyarov bildirib.
Nazir deyib: "Şərq tərəfdaşlığı" proqramının iştirakçısı olan ölkələrin XİN rəhbərlərinin dördüncü qeyri-rəsmi görüşünün bütün iştirakçıları onu da qeyd etdilər ki, ölkələrin beynəlxalq səviyyədə tanınmış sərhədləri dəyişdirilə bilməz. Bu, həll olunmamış münaqişələrdən əziyyət çəkən bütün ölkələrin vahid fikridir".
Moldova baş nazirinin müavini və xarici işlər naziri Natalya German isə deyib ki, Şərq tərəfdaşlığı ölkələri üçün təhlükəsizlik məsələsi olduqca önəmlidir: "Biz öz fəaliyyətimizi beynəlxalq hüquq prinsipləri əsasında qururuq. Fəaliyyətlər ərazi bütövlüyü, suverenlik və daxili işlərə qarışmama yönündə olmalıdır. Şərq tərəfdaşlığı ölkələri bir-birinə dəstək göstərirlər. Biz əməkdaşlığımızı GUAM çərçivəsində koordinasiya edirik. Dörd ölkənin səsinin beynəlxalq səhnədə eşidilməsini istəyirik. Moldova Ukraynanın qonşusudur və Ukraynada baş verənləri narahatlıqla müşahidə edirik. Krımın qanunsuz qəsb edilməsini dəstəkləmirik. Biz bütün regiona Ukraynadakı münaqişənin təsirini nəzərə alırıq".
O qeyd edib ki, Ukraynada davam edən münaqişəyə rəğmən Moldova öz qəti seçimini etdi: "Biz Aİ-yə inteqrasiya etmək istəyirik. Hər bir ölkənin suveren seçim hüququ var. Biz regionda qonşularımızla əməkdaşlığı bu əsasda quracağıq".
Aİ-nin xarici işlər və təhlükəsizlik siyasəti üzrə ali nümayəndəsinin müavini Helqa Şmidt brifinqdə deyib ki, Ukraynadakı böhran "Şərq tərəfdaşlığı"na zərər yetirir. H.Şmidtin sözlərinə görə, Aİ hesab edir ki, Ukrayna məsələsində atəşkəsə əməl olunmalıdır.
Onun sözlərinə görə, burada Aİ-nin rolu çox mühümdür: "Şərq tərəfdaşlığı" ölkələrində dondurulmuş münaqişələr həll olunmalıdır.
Aİ-nin Genişlənmə və Avropa Qonşuluq Siyasəti üzrə komissarı Ştefan Füle isə bildirib ki, "Şərq tərəfdaşlığı" ölkələrinin suverenliyi, ərazi bütövlüyü və müstəqilliyi Avropa üçün vacibdir. Ş.Füle bildirib ki, Aİ bu ölkələrlə tərəfdaşlığı gücləndirmək niyyətindədir. Onun sözlərinə görə, diferensiasiyanın önəmi getdikcə artacaq: "İnklüzivlik "Şərq tərəfdaşlığı"nın çox önəmli hissəsidir. Hər altı ölkənin suverenliyi, ərazi bötüvlüyü və müstəqilliyi bizim üçün vacibdir".
Aİ rəsmisi qeyd edib ki, Azərbaycan və Ermənistan Dağlıq Qarabağ münaqişəsinin həlli üçün siyasi iradə nümayiş etdirərlərsə, Avropa İttifaqı bu ölkələri dəstəkləməyə hazırdır: "Dağlıq Qarabağ münaqişəsinin həlli beynəlxalq normalara əsaslanmalıdır".
Lakin o əlavə edib ki, Dağlıq Qarabağ münaqişəsi və Krım böhranı arasında paralel aparmaq düzgün olmazdı.
Avropa komissarı deyib ki, Azərbaycan Avropa İttifaqının vacib tərəfdaşıdır: "Əminəm ki, ölkə gələcəkdə Avropanın enerji təhlükəsizliyinin təmin edilməsində daha böyük rol oynayacaq".
Ş.Füle vurğulayıb ki, Azərbaycana cari səfəri çərçivəsində Avropa komissarı kimi vətəndaş cəmiyyətinin nümayəndələri ilə görüş keçirib: "Fikrimcə, gələcəkdə Azərbaycanda vətəndaş cəmiyyətinin fəaliyyəti üçün platforma daha da genişlənəcək. Azərbaycan Avropa Şurası Nazirlər Komitəsində sədrlik edir və güman edirəm ki, ölkə sədrlik çərçivəsində bu təşkilata öz töhfəsini verəcək".