Səfir: Ukraynada seçkilər Rusiyanın ssenarisi ilə keçmədi

"Kiyev özünü Ukraynadan ayırmış Donbası kəsib atmaq niyyətində deyil. Hökumət bu regionun dinc sakinlərinə humanitar yardım göstərməkdə davam edir". Bu barədə Ukraynanın Azərbaycandakı səfiri Aleksandr Mişenko ölkədə keçirilən parlament seçkilərinin nəticələri ilə bağlı mətbuat konfransında deyib.
Səfir bildirib: "Eləcə də regionlar arasında qarşılıqlı anlaşma, onların enerji təminatı, maliyyələşdirilmə məsələlərinə də baxılır".
Ali Radaya keçirilən seçkilərin yekunlarından danışarkən diplomat bildirib ki, bu gün vəziyyət elədir ki, parlamentə keçən partiyalardan koalisiya yaradılacaq.
Onun sözlərinə görə, ilk dəfə kommunistlər Ukrayna parlamentində təmsil olunmayacaqlar. Çünki onlar əhalinin etimadını tamam itiriblər: "Ukraynada seçkilər Rusiyanın ssenarisi ilə keçmədi. Kremlə dağılmış Ukrayna lazımdır, hakimiyyətə etimadsızlıq lazımdır, lakin bu, olmayacaq".
Səfir Ukraynanın şərqində keçirilən qondarma seçkilərlə bağlı bir sıra ölkələrə, o cümlədən Azərbaycana müraciət etdiklərini də xatırladaraq "Hazırda Azərbaycan hökumətinin bununla bağlı reaksiyasını, açıqlaması gözləyirik. İnanırıq ki, Azərbaycan bununla bağlı mövqeyini ortaya qoyacaq", - deyə bildirib.
Səfir deyib ki, Azərbaycan və Ukrayna arasında ticarət-iqtisadi əməkdaşlıq üzrə hökumətlərarası komissiyanın iclasının keçirilməsi gözlənilir. Onun sözlərinə görə, Azərbaycan və Ukrayna Prezidentləri Şurası fəaliyyət göstərir və bu çərçivədə ildə bir dəfə hər iki dövlət başçısının görüşü keçirilir. A.Mişenko qeyd edib ki, Ukrayna Prezidentinin Azərbaycana səfəri ilə bağlı planlar var: "Səfərin dəqiq tarixi diplomatik kanallar vasitəsilə müəyyənləşdiriləcək".
O, əlavə edib ki, Prezidentin səfəri haqqında komissiyanın iclasından sonra daha konkret danışmaq mümkün olacaq.
Səfir həmçinin deyib ki, ölkəsi Krım və Donbasdan olan məcburi köçkünlərin yerləşdirilməsi ilə bağlı Azərbaycanın təcrübəsi ilə maraqlanır. Bir müddət əvvəl Azərbaycanın baş nazirinin müavini, Qaçqınların və məcburi Köçkünlərin işləri üzrə Dövlət Komitəsinin sədri Əli Həsənovun qəbulunda olduğunu deyən səfir bildirib ki, görüşdə Krım və Donbasdan olan məcburi köçkünlərin yerləşdirilməsi üçün Azərbaycanın təcrübəsi ilə maraqlanıb: "Əli Həsənov dedi ki, bununla bağlı Ukrayna nümayəndələrini qəbul etməyə, kömək etməyə hazırdır".