"Türk Fraksiyasının yaradılması Azərbaycan türkləri üçün tarixi hadisədir"

İran Parlamentində Türk Fraksiyasının yaradılmasını alqışlayırıq.
Bu sözləri Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev partiyanın mətbuat xidmədinə açıqlamasında deyib.
BAXCP sədrinin sözlərinə görə, İran Parlamentində 72 millət vəkilindən ibarət Türk Fraksiyasının yaradılması Azərbaycan türkləri üçün tarixi hadisədir: "Bu fraksiyanın yaradılmasında milli xarakter və fədakarlıq nümayiş etdirən soydaşlarımızın fəaliyyətini yüksək qiymətləndiririk. Ümid edirəm ki, Türk Fraksiyası Güney Azərbaycan türklərinin hüquq və azadlıqlarının qorunması, Azərbaycan türkcəsinin funksional dil statusu qazanması, milli mədəniyyətimizin tətbiqi və təbliği üçün bütün mümkün imkanlardan istifadə edəcək. Bü mühüm tarixi hadisə münasibətilə bütün azərbaycanlıları təbrik edir, fədakar soydaşlarımıza, millət vəkillərimizə dərin minnətdarlığımı bildirirəm".
Qüdrət Həsənquliyev bütün soydaşlarımızı Türk Fraksiyasının fəaliyyətinə dəstək verməyə çağırıb və qeyd edib ki, BAXCP İran Parlamentinin Türk Fraksiyası ilə yaxından əməkdaşlıq etməyə hazırdır.