Erməni zabiti: "Azərbaycan Ordusu Cəbrayıldan Xocavəndə qədər postlarını əzib keçib"

Rusiyanın "RİA Novosti" agentliyinin müxbiri Azərbaycanın işğal olunmuş Dağlıq Qarabağ regionundan reportaj hazırlayıb.
Reportajda aprel döyüşlərindən sonra regionun cənub-şərqi istiqamətində - Cəbrayılda nisbi sakitlik olduğu bildirilir: "BMT öz qətnamələrində ermənilərin bu rayonu qanunsuz işğal etdiyini ifadə edib. Nə vaxtsa bura çiçəklənən şəhər idi. Amma indi evlər tamamilə tərk edilib".
Qarabağda yerləşdirilən erməni hərbi birləşmələrinin komandir müavini agentliyin müxbirinə deyib ki, Azərbaycan Ordusu Cəbrayıldan Xocavəndə qədər postlarını əzib keçib: "Bu təxminən 40 kilometrə qədər ərazi deməkdir. Mən belə döyüşü yalnız filmlərdə görmüşdüm".
Bölmə komandirinin müavini indi yeni səngər qazdıqlarını bildirir: "Biz Azərbaycan bayrağını aydın şəkildə görürük. Azərbaycan Ordusu müasir arsenala sahibdir".