Azərbaycanın Zəngilan rayonunun Ermənistan silahlı qüvvələri tərəfindən işğalının 21-ci ildönümü anılıb. APA-nın məlumatına görə, ötən gün Zəngilan rayon İcra Hakimiyyəti və rayon ictimaiyyətinin nümayəndələri Şəhidlər xiyabanında olublar. Əvvəlcə ictimaiyyət nümayəndələri "Əbədi Məşəl" kompleksini, daha sonra Şəhidlər xiyabanında dəfn olunmuş zəngilanlı döyüşçülərin məzarlarını ziyarət ediblər. Daha sonra Abşeron rayonunun Masazır qəsəbəsinin ərazisində yerləşən Zəngilan rayon İcra Hakimiyyətinin binasında rayon sakinlərinin iştirakı ilə anım mərasimi keçirilib. Qeyd edək ki, 1993-cü il oktyabrın 29-da erməni hərbi birləşmələri Azərbaycanın Dağlıq Qarabağ bölgəsi ətrafında sonuncu rayonun – Zəngilanın işğalını başa çatdırıblar. Bakı-Culfa-Naxçıvan dəmiryolunun üzərində yerləşən və mühüm strateji əhəmiyyətə malik Zəngilan rayonunun ərazisi 700 kvadrat km, əhalisi isə 35 mindən çox olub. İşğaldan sonra Bakı-Mincivan-Qafan dəmiryolu xəttinin keçdiyi Mincivan stansiyası tamamilə dağılıb. İşğal olunmazdan əvvəl bir şəhər, bir qəsəbə və 83 kənddən ibarət olan Zəngilanda 9 məktəbəqədər müəssisə, 19 ibtidai məktəb, 15 orta məktəb, bir texniki peşə və musiqi məktəbi, 35 kitabxana, 8 mədəniyyət evi, 23 klub müəssisəsi və 22 kinoqurğu fəaliyyət göstərib. Ümumilikdə I Qarabağ müharibəsində Zəngilan rayonu 188 şəhid verib. 35 min nəfərə yaxın rayon sakini hazırda məcburi köçkün kimi Azərbaycanın ən müxtəlif bölgələrində məskunlaşıb. Müharibə dövründə rayonun 44 sakini itkin düşüb və onların taleyindən bu günədək xəbər yoxdur.
Hazırda ermənilər rayon ərazisində qeyri-qanuni məskunlaşma aparırlar. Ərazidə Suriyadan və Livandan gələn erməni ailələri yerləşdirilib. Ermənilər Zəngilan rayonu ərazisində ekoloji terroru davam etdirirlər. Ermənilərin törətdiyi mütəmadi yanğınlar nəticəsində rayon ərazisinin böyük bir hissəsi külə dönüb, yaşıllıqlar, qoruqlar, qiymətli ağaclar ermənilər tərəfindən tamamilə qırılaraq məhv edilib.