Fələstin Dövlətinin prezidenti Mahmud Abbas Qafqaz Müsəlmanları İdarəsinin sədri şeyxülislam Allahşükür Paşazadəni Fələstinə dəvət edib. Dəvəti şeyxülislama Azərbaycanda rəsmi səfərdə olan Fələstinin xarici işlər naziri Riyad əl-Maliki çatdırıb.
Xatırladaq ki, iki gün öncə Allahşükür Paşazadə öz iqamətgahında Riyad əl-Malikini qəbul edib.
Allahşükür Paşazadə Riyad əl-Malikinin səfərini mühüm hadisə hesab etdiyini söyləyib, Azərbaycanla Fələstin arasında dostluq əlaqələrinin tarixi köklərə əsaslandığını, son illərdə bu sahədə çox mühüm addımlar atıldığını vurğulayıb.
Allahşükür Paşazadə bildirib ki, Azərbaycan beynəlxalq təşkilatlarda hər zaman Fələstin Dövlətinin haqq işini müdafiə edib və bu mənəvi dəstək bundan sonra da davam edəcək. Şeyxülislam Azərbaycanın ərazi bütövlüyü məsələsində Fələstinin tutduğu mövqeyi yüksək qiymətləndirib.
Riyad əl-Maliki deyib ki, Azərbaycan Fələstinə həm humanitar yardım göstərir, həm də beynəlxalq təşkilatlarda daim müdafiə edir. Nazir şeyxülislamın Azərbaycan və Fələstin xalqları arasında münasibətlərin inkişafındakı xidmətlərinin ölkəsində yüksək dəyərləndirildiyini diqqətə çatdırıb. O, prezident Mahmud Abbasın adından şeyxülislam Allahşükür Paşazadəni Fələstinə səfərə dəvət edib və bu dəvəti çatdırmaqdan məmnunluq duyduğunu deyib.