Vyanada İranla Atom Enerjisi üzrə Beynəlxalq Agentlik (AEBA) arasında növbəti texniki danışıqlar keçirilib.
APA-nın "Radiofərda"ya istinadən verdiyi məlumata görə, bununla bağlı agentliyin yaydığı bəyanatda bildirilir.
Sənəddə indiyədək razılaşma çərçivəsində tərəflər arasında əldə olunmuş irəliləyişlərlə bağlı fikir mübadiləsinin aparıldığı bildirilir. Bəyanatda həmçinin deyilir ki, İran razılaşma mətnində üzərinə düşən bəzi öhdəlikləri yerinə yetirib və həyata keçirilməsi labüd olan növbəti addımlarla bağlı danışıqlar davam etdiriləcək. Ancaq bəyanatda İranla AEBA arasında növbəti texniki danışıqların tarixi və məkanı barədə məlumat verilməyib.
Qeyd edək ki, bu gün BMT-nin Vyanadakı qərargahında yekun nüvə razılaşmasının mətninin yazılması məqsədilə İranla "altılıq" ölkələri arasında növbəti nüvə müzakirələri başlayacaq. Danışıqlar Avropa Birliyinin xarici işlər və təhlükəsizlik siyasəti üzrə ali nümayəndəsi Ketrin Eşton və İran xarici işlər naziri Məhəmməd Cavad Zərifin rəhbərliyi altında baş tutacaq. Bu gün axşam əvvəlcə M.C.Zərif və K.Eşton işgüzar şam yeməyində bir araya gələcəklər. Mayın 14-16-da İran və "altılıq" ölkələri arasında üç gün müddətində ümumi və təkbətək danışıqlar keçiriləcək.