Azərbaycan Dövlət YUĞ Teatrının “Mən – Dədə Qorqud: Epizod 1. Başlanğıc” tamaşasının 10 oktyabr tarixində Azərbaycan Dövlət Milli Gənc Tamaşaçılar Teatrında daxili baxışı keçirilib.

APA YUĞ Teatrına istinadən xəbər verir ki, səhnə əsərini teatrın bədii şurasının üzvləri və Azərbaycan Respublikası Mədəniyyət Nazirliyinin nümayəndələri izləyib.

“Dədə Qorqud” dastanının “Dirsə xan oğlu Buğac” boyu əsasında hazırladığı tamaşada Əməkdar artist Qasım Nağı və aktyorlar Mətanət Abbas, Vüqar Hacıyev, Amid Qasımov iştirak edib. İlahi oyun janrlı səhnə əsərinin quruluşçu rejissoru Mikayıl Mikayılov, quruluşçu rəssamı Mustafa Mustafayev, xoreoqrafı Anar Mikayılov, musiqi tərtibatçısı isə İffət Əsgərovdur.

Qeyd edək ki, YUĞ Teatrı “Mən – Dədə Qorqud: Epizod 1. Başlanğıc” tamaşası ilə Meksika Birləşmiş Ştatlarının Metepek şəhər bələdiyyəsi tərəfindən təşkil edilən 35-ci Kimera Beynəlxalq İncəsənət və Mədəniyyət Festivalında iştirak edəcək. Festival çərçivəsində tamaşa 16 oktyabr tarixində Quimera teatrında nümayiş olunacaq.