Azərbaycan Respublikası Mədəniyyət Nazirliyinin təşəbbüsü və təşkilatçılığı, aparıcı bədii kollektivlərin iştirakı ilə gerçəkləşən ölkə miqyaslı qastrol proqramı davam edir.

Layihə çərçivəsində Heydər Əliyev Sarayının Niyazi adına Dövlət Simfonik Orkestri mayın 5-də Xaçmaz şəhərində konsert proqramı ilə çıxış edəcək.

Saat 16:00-da Heydər Əliyev adına Xaçmaz rayon Mədəniyyət Mərkəzində keçiriləcək konsertdə Xalq artisti, Niyazi adına Dövlət Simfonik Orkestrinin bədii rəhbəri Yalçın Adıgözəlovun dirijorluğu ilə Üzeyir Hacıbəyli, Qara Qarayev, Fikrət Əmirov, Antonio Salyeri, Asəf Zeynallı, Vasif Adıgözəlov, Hacı Xanməmmədov və digər bəstəkarların əsərləri səsləndiriləcək.

Qeyd edək ki, qastrol proqramının əsas məqsədi ölkə üzrə vahid mədəni məkanın formalaşdırılması, regionlarda mədəni həyatın daha da canlandırılması və yüksək səviyyəli incəsənət nümunələrinin bütün vətəndaşlar üçün əlçatanlığının təmin olunmasıdır. Layihə eyni zamanda milli incəsənətin regionlarda daha geniş təqdimatına və gənclərin mədəni proseslərə fəal cəlb olunmasına xidmət edir.

Cavid