Rusiyanın "Qazprom" şirkəti Bolqarıstan və Polşaya qaz nəqlini tamamilə dayandırıb.

Bu barədə "Qazprom"un bəyanatında deyilir.

Qeyd olunur ki, qərar "Bulgargaz" (Bolqarıstan) və PGNiG (Polşa) şirkətlərinin qaz tədarükü üçün ödənişləri rublla həyata keçirməməsi ilə əlaqədar verilib.

"Qazprom" aprelin 26-dək olan müddət ərzində ödənişlərin daxil olmadığını bildirib.

Eyni zamanda, Rusiya tərəfi bu ölkələrin ərazisindən digər ölkələrə tranzit qaz nəqlinin davam edəcəyini vurğulayıb.

Bu qərardan sonra Avropa birjalarında təbii qaz 21 faiz bahalaşaraq min kubmetr üçün 1 350 dollar həddini keçib.