Pakistan İslam Respublikasının maliyyə naziri Muhammad Aurangzebin APA-ya müsahibəsi.

- Pakistan Azərbaycanın təsisçisi olduğu İqlim Maliyyəsi üzrə Fəaliyyət Fonduna (İMFF) vəsait ayırmağı düşünürmü?

- COP29 çox möhtəşəm tədbirdir. İqlim dəyişmələrinə qarşı tədbirlər görmək baxımından götürülən öhdəliklər heyrətamizdir. Pakistan iqlim dəyişmələrinə həssaslıq göstərən ölkələrdən biridir. İldən-ilə iqlimə dayanıqlığı və karbonsuzlaşdırma məsələlərinə sadiqliyimizi daha da artırırıq. İqlim dəyişmələri üzrə nazirimiz Romina Xurşid Alam da COP29 konfransında iştirak edir. O, bu mövzuda bütün təşəbbüslərə rəhbərlik edir. Baş nazir Şahbaz Şərif də konfransda iştirak edib. Biz iqlim dəyişmələrinə qarşı mübarizəni artırmağa tam sadiqik.

- Pakistanın Azərbaycana birbaşa investisiya planları varmı?

- Bu, iki ölkə arasında araşdırma predmetidir. Hər iki ölkənin sərmayə qoyula bilən, maliyyələşdirilə bilən layihələrə açıq perspektivləri var. Biz hazırda bu istiqamətdə işləyirik. Biz ölkəyə sərmayə qoymaq üçün düzgün imkanlar axtarmalıyıq. Hesab edirəm ki, maliyyə və investisiya nöqteyi-nəzərindən indi iki ölkə arasında imkanlarımız böyükdür. Azərbaycan Prezidenti cənab İlham Əliyev Pakistanda olarkən 2 milyard dollarlıq investisiya yatırılacağı barədə bildirmişdi. Beləliklə, iki ölkə arasında investisiya və ixrac axınının potensialı böyükdür.

- Pakistanın Azərbaycanda bankı var idi, amma bağlanıb. Ölkələrin Bank açmaq planları barədə nə deyə bilərsiniz?

- Pakistan ölkəyə gələn bankları alqışlayır. Pakistan bank sistemi iki ölkə arasında investisiya və ticarət axınlarını dəstəkləmək üçün nə lazımdırsa təmin edə bilər. Çünki bankçılıq ticarət və investisiya axınlarını asanlaşdırır.