Ərdəbil şəhərində yaşayan tanınmış hüquqşünas və milli-mədəni fəal Pərviz Siyabi Gürcani Ərdəbilin İnqilab Məhkəməsinin 1-ci bölməsi tərəfindən 16 il həbs cəzasına məhkum edilib.

İnqilab Məhkəməsi hüquqşünasa qarşı bir neçə ağır ittiham irəli sürərək onun uzun müddətli həbsinə qərar verib.

O, “rejimə qarşı olan media ilə əlaqə saxlamaq və sosial şəbəkələrdə, kütləvi informasiya vasitələrində sistemin bütünlüyünə və təməlinə qarşı çıxmaq məqsədilə müsahibələr vermək, həqiqətə uyğun olmayan məlumatlar dərc etməklə İran İslam Respublikasının müqəddəs sisteminə qarşı təbliğat fəaliyyəti aparmaq”, “ölkənin təhlükəsizliyini pozmaq məqsədi ilə real olmayan qrupları idarə etmək” və “ölkənin təhlükəsizliyini pozmaq məqsədi ilə qeyri-qanuni qruplara və dəstələrə üzv olmaq”da ittiham olunub.

İran təhlükəsizlik və kəşfiyyat idarəsinin Ərdəbil bölməsinin hesabatına istinadən verilən məhkəmə qərarında, Pərviz Siyabinin kiberməkanda və teleqram qruplarında fəaliyyətləri, audio fayllar yayması, 24 iyul tarixində Təbrizdə keçirilən etiraz aksiyalarına dəstək verməsini cinayət hesab edərək, onu Abbas Lisaninin başçılıq etdiyi qeyri-qanuni “Güney Azərbaycan” qrupunun üzvü olmaqda ittiham edib.

“Təqsirləndirilən şəxs qeyri-qanuni telegram qruplarının digər üzvləri ilə də fəal əlaqədə olub. Aydındır ki, müttəhim bu qrupların məqsədləri ilə tanış olub və kifayət qədər biliyə malik olub. Üçüncüsü, cinayətkar qrupun təhlükəsizlik əleyhinə cinayətləri əlaqələndirmək məqsədilə idarə olunması sübuta yetirilib. Cənab Siabinin bu qruplarda etdiyi hərəkətlər yalnız adi bir insanın hərəkətləri deyil, həm də idarəçi və təşkilatçılıqdan irəli gələn hərəkətlərdir”-deyə, qərarın başqa bir bölümündə qeyd olunub.

Məhkəmə qərarında ərdəbilli hüquqşünasın ittihamları izah edilərək onun barəsində çıxarılan cəza qərarları aşağıdakı kimi bildirilib:
“Cinayət məhkəməsi təqsirləndirilən şəxsə “möhtərəmlik dərəcəsinə qədər” və

2013-cü ildə təsdiq edilmiş İslami Cəza Məcəlləsinin “cəzalar və çəkindirici cəzalar” kitabının 498, 499 və 500-cü maddələrini və 134-cü maddənin A bəndini və 18-ci maddəsini və B bəndini əsas götürərək, təqsirləndirilən şəxsə hökm çıxarıb. Törədiyi cinayətlərin sayına, cinayət məqsədli hərəkətlərə rəhbərlik və onların irəli aparılmasındakı rolunun əhəmiyyətinə, bölgədə, xüsusən də azəridilli “türk” bölgələrindəki digər gəncləri cinayətə və separatizmə təhrik etdiyinə, özünə bağlı olan qrupların fikir qaynağı olduğuna görə, cinayətkar qrupa rəhbərlik etdiyinə görə 10 il, cinayətkar qrupa üzvlüyünə görə 5 il, rejim əleyhinə təbliğat fəaliyyətinə görə isə 1 il azadlıqdan məhrumetmə cəzası verilir”.

Pərviz Siyabi gürcüani barəsində çıxarılan qərarın son bölümündə ona aid olan və axtarış zamanl götürülən şəxsi əşyaları barədə belə yazılıb:

“Təqsirləndirilən şəxsdən aşkar edilərək götürülən texniki təchizat və ona aid olan başqa əşyalar, o cümlədən: noutbuk,mobil telefonlar, rəsmi və qanuni lisenziyaya malik “Keyhan” qəzetinin arxivi və s. 2013-cü ildə təsdiq edilmiş İslam Cəza Qanununun 215-ci maddəsinə əsasən, təqsirləndirilən şəxsə qaytarılır. Bununla yanaşı lisenziyası olmayan filmlər, kitablar və jurnallar da daxil olmaqla başqa materiallar, yuxarıdakı maddəyə uyğun olaraq Kəşfiyyat Təşkilatının nəzarəti altında hökumətin xeyrinə müsadirə edilir”.
Qeyd edək ki, Pərviz Siyabi gürcani 25 iyul tarixində təhlükəsizlik məmurları tərəfindən saxlanılıb. O, 5 avqustda dindirilmə müddəti bitdikdən sonra təhlükəsizlik idarəsinin təcridxanasında Ərdəbil zindanına köçürülüb və 29 avqust tarixində 250 milyon tümən girov qarşılığında müvəqqəti olaraq məhkəməyə qədər sərbəst buraxılıb.

Gunaz.tv